मकवानपुर । मदन भण्डारी स्वास्थ्य विज्ञान प्रतिष्ठान, हेटौंडा अस्पतालसहित बागमती प्रदेशका विभिन्न अस्पतालमा अक्सिजन अभावका कारण कोरोनाका बिरामीहरुको उपचारमा कठिनाई भइरहँदा समेत बागमती प्रदेश सरकारले त्यसको समाधानमा चासो देखाएको छैन ।
बागमती प्रदेश सरकारले कोरोना संक्रमणको जोखिम न्यूनिकरणका लागि गत आर्थिक वर्ष कोरोना विपद् कोष स्थापना गरी रकम संकलन गरेको थियो । उक्त कोषमा बागमती प्रदेश सरकार, प्रदेशका विभिन्न निकायका पदाधिकारी, कर्मचारी, जनप्रतिनिधि तथा विभिन्न बैंक तथा वित्तीय संस्थाले स्वेच्छाले रकम जम्मा गरेका थिए ।
खाता सञ्चालन गरेको केही अवधिमै उक्त कोषमा ४४ करोड ४३ लाखभन्दा बढी रकम जम्मा भएको मुख्यमन्त्री तथा मन्त्रिपरिषद्को कार्यालय हेटौंडाले जनाएको छ ।
बागमती प्रदेश सरकारले विभिन्न समयमा कोरोना संक्रमण नियन्त्रणका लागि भन्दै प्रदेशका १३ जिल्ला र सबै स्थानीय तहमार्फत् ३१ करोड ४८ लाख रुपैयाँ खर्च गरिसकेको छ भने कोषमा करिब १३ करोड रुपैयाँ बाँकी रहेको मुख्यमन्त्री कार्यालयको तथ्याङ्कमा उल्लेख छ ।
किन बनाइँदैन अक्सिजन प्लान्ट ?
प्रदेश सरकारको कोरोना विपद् कोषमा करिब १३ करोड रुपैयाँ बाँकी रहे पनि उक्त रकम सदुपयोग गर्नतर्फ प्रदेश सरकारले चासो देखाएको छैन ।
प्रदेशका २ वटामा बाहेक अन्य अस्पतालमा अक्सिजन प्लान्ट सञ्चालनमा ल्याउन सकिएको छैन । अन्य २ वटा अस्पतालमा प्लान्ट स्थापनाका लागि सम्झौता भइरहेको सामाजिक विकास मन्त्रालयका प्रवक्ता डा. पुरुषोत्तम राज सेढाई बताउँछन् ।
एउटा अस्पतालमा प्लान्ट स्थापना गर्न करिब ३ करोड रुपैयाँ आवश्यक पर्ने मदन भण्डारी स्वास्थ्य विज्ञान प्रतिष्ठानका रजिष्ट्रार राजेश प्रसाई बताउँछन् ।
प्रदेश सरकारले चाहने हो भने विपद् कोषकै रकमबाट प्रदेशका थप ४ वटा अस्पतालमा त्यस्ता प्लान्ट निर्माण सकिन्छ । सो रकमले करिब १ महिनाको अवधिमा प्लान्ट निर्माण गर्न सकिने जानकारहरु बताउँछन् । तर, मुख्यमन्त्री डोरमणि पौडेलले चासो नदेखाउँदा रकम भएर पनि हेटौँडा अस्पतालसहित प्रदेशका अन्य अस्पतालमा अक्सिजन प्लान्ट स्थापना हुन नसकेको हो ।
तत्कालीन हेटौँडा अस्पताल विकास समितिले पटक–पटक अक्सिजन प्लान्ट निर्माणका लागि प्रदेश सरकारका सम्बन्धित निकायहरुमा प्रस्ताव गरेको थियो । तर, राजनीतिक दाउपेचका कारण उक्त प्रस्ताव सम्बन्धित मन्त्रालयको घर्रामा थन्कियो ।
हाल प्रदेशको राजधानीसमेत रहेको हेटौंडाको एकमात्र सरकारी अस्पतालमा अक्सिजनको चरम अभाव छ । शुक्रबार नुवाकोट, पर्सासहितका केही उद्योगबाट अक्सिजनको जोगाड गरी संक्रमितको उपचारमा प्रयोग गरियो ।
हेटौँडा अस्पतालले विभिन्न सप्लायर्स, अस्पताल र अन्य जिल्लाबाट अक्सिजन सिलिन्डर ल्याउन पहल गरिरहेको छ । तर, ती सबै पहल सार्थक भएको अवस्थामा समेत उपचाररत संक्रमितलाई एक दिनको आवश्यकता मात्र टर्ने चिकित्सकहरुको भनाइ छ ।
अक्सिजन अभाव बढ्दै जाने देखिएको भन्दै उनीहरुले यसको दीर्घकालीन समाधान खोज्न ढिला गर्न नहुने बताए ।
उपमहानगरपालिका समाधान खोज्दै
हेटौंडा अस्पतालमा अक्सिजन अभावको समस्या समाधान गर्न हेटौंडा उपमहानगरपालिकाले पहलकदमी सुरु गरेको छ । अक्सिजन अभावको दीर्घकालीन समाधानका लागि उपमहानगरपालिकाले अक्सिजन प्लान्ट निर्माणका लागि छलफल सुरु गरेको हो ।
मदन भण्डारी स्वास्थ्य विज्ञान प्रतिष्ठान हेटौंडा अस्पतालले तयार गरेको अक्सिजन प्लान्ट स्थापना परियोजना प्रस्तावसहित हेटौंडा उपमहानगरपालिका छलफलमा जुटेको हो । रातोपाटीबाट
