काठमाडौं: संघीय संसद् अन्तर्गत प्रतिनिधिसभाको छैटौँ अधिवेशनको २५औँ बैठक आज दिउँसो २ बजेका लागि बोलाइएको छ। यद्यपि, विपक्षी दलहरूको लगातारको अवरोधका कारण बैठकहरू पटक–पटक स्थगित हुँदै आएका छन्।
आजको बैठकमा सभामुखले प्रधानमन्त्री तथा मन्त्रिपरिषद्को कार्यालयबाट प्राप्त कार्यभारसम्बन्धी पत्रहरू पढेर सुनाउने कार्यसूची रहेको छ।
बैठकमा उपप्रधानमन्त्री तथा अर्थमन्त्री विष्णुप्रसाद पौडेलले आर्थिक वर्ष २०८२/०८३ को राजस्व र व्ययको वार्षिक अनुमानमाथि सामान्य छलफल प्रारम्भ गरियोस् भन्ने प्रस्ताव वक्तव्यसहित प्रस्तुत गर्ने कार्यक्रम छ। त्यसपछि वार्षिक बजेट अनुमानमाथि सामान्य छलफल औपचारिक रूपमा सुरु हुनेछ।
त्यसैगरी, राज्य व्यवस्था तथा सुशासन समितिका सभापति रामहरि खतिवडाले ‘संघीय निजामती सेवा विधेयकसम्बन्धी समितिको प्रतिवेदन, २०८२’ पेस गर्ने कार्यसूची पनि बैठकमा समावेश गरिएको छ।
