गण्डकी: पोखरामा खानेपानी आपूर्तिमा सुधारको माग गर्दै होटल सङ्घ पोखराले नेपाल खानेपानी संस्थानको ध्यानाकर्षण गराएको छ। सङ्घका अध्यक्ष लक्ष्मण सुवेदीको नेतृत्वमा गएको टोलीले संस्थानको पोखरा कार्यालय पुगेर पानीको नियमित आपूर्ति नहुँदा पर्यटन व्यवसायमा देखिएको समस्याबारे जानकारी गराउँदै तुरुन्त समाधानको आग्रह गरेको हो।
टोलीले कार्यालयका सहायक प्रमुख प्रबन्धक इञ्जिनियर आशिष कार्कीलाई भेटी लेकसाइड, ड्यामसाइड जस्ता मुख्य पर्यटकीय क्षेत्रमा खानेपानीको अभावले व्यवसायमा गम्भीर असर परेको बताएको अध्यक्ष सुवेदीले जानकारी दिनुभयो। उहाँले पोखरा भ्रमण वर्ष २०२५ चलिरहेका बेला यस्ता समस्या आउनु दुःखद् भएको उल्लेख गर्दै यसले पर्यटन क्षेत्रमा नकारात्मक सन्देश जान सक्ने भन्दै सबै पक्ष जिम्मेवार बन्नुपर्ने धारणा राख्नुभयो।
सङ्घले बुझाएको ध्यानाकर्षणपत्रमा भनिएको छ, “पोखराका होटल तथा अन्य पर्यटन व्यवसायीहरू सुक्खा मौसमसँगै आवश्यक मात्रामा खानेपानी नपाउँदा बोरिङको पानी किनेर पाहुनालाई सेवा दिन बाध्य छन्। यस्तो अवस्थामा लेकसाइड, ड्यामसाइडलगायत पर्यटक आवासीय क्षेत्रमा नियमित खानेपानी आपूर्ति मिलाइदिनुहुन हार्दिक अनुरोध गर्दछौँ।”
सङ्घका निवर्तमान अध्यक्ष विकल तुलाचन, प्रथम उपाध्यक्ष दीपक श्रेष्ठ, उपाध्यक्ष गणेशराज पहारी, कोषाध्यक्ष नेत्रप्रसाद पौडेललगायतले पनि खानेपानी समस्याको तत्काल समाधान गर्न आग्रह गर्नुभयो।
खानेपानी संस्थानका सहायक प्रमुख प्रबन्धक कार्कीले सन् २०१५ को पुरानो योजनाअनुसार हालको आयोजना अघि बढेको र जाइकाबाट प्राप्त पानीले समेत पोखराको माग पुरा गर्न नसकेको जानकारी दिनुभयो। उहाँले चुहावट र पानी चोरीजस्ता समस्या अझै रहेका कारण आपूर्ति प्रभावकारी नभएको उल्लेख गर्दै आवश्यक सुधारका प्रयास जारी रहेको प्रतिबद्धता व्यक्त गर्नुभयो।
