काठमाडौं: नेपाली कांग्रेसका नेता डा. शेखर कोइरालाले पार्टी सभापतिसँग आफ्नो कुनै मतभेद नरहेको स्पष्ट पारेका छन्। प्रेस युनियन धनुषाले आइतबार जनकपुरधाममा आयोजना गरेको पत्रकार भेटघाटमा कोइरालाले सभापतिसँग पूर्ण सहकार्य र समन्वय रहेको बताउँदै पार्टीमा कुनै विवाद वा मतभेद नभएको उल्लेख गरेका हुन्।
कोइरालाले पार्टीभित्रका बहसहरूलाई सञ्चारमाध्यमले बढाइचढाइ प्रस्तुत गर्ने गरेको भन्दै, गगन थापाले आफूहरूसँगै रहेको र आगामी महाधिवेशनमा सभापतिमा उम्मेदवारी दिने विषयमा कुनै चर्चा नभएको बताए।
पार्टीमा १५ वर्षसम्म महाधिवेशन प्रतिनिधि रहेका कुनै पनि नेता सभापति पदका लागि उम्मेदवार बन्न सक्ने वैधानिक व्यवस्था रहेको उनले स्पष्ट गरे। गगन थापा र पूर्वराजाबीच भएको भेटघाटबारे आफूलाई कुनै जानकारी नभएको पनि कोइरालाले बताए।
कोइरालाले राजनीतिक स्थायित्वका लागि कांग्रेस र एमालेबीच गठबन्धन गरेर सरकार बनाउनु पर्ने आवश्यकता रहेको उल्लेख गरे। संविधान सुधारका लागि पनि दुई दलको सहकार्य अनिवार्य भएको उनले बताए। संविधान सुधारको लागि गृहकार्य सुरु भइसकेको भन्दै, कोइरालाले अन्य दलहरूसँग मिलेर सुधारका लागि काम गर्नुपर्ने धारणा राखे।
उनले वर्तमान गठबन्धन सरकार दुई पार्टीको सहमतिमा बनेको भएकाले, आगामी डेढ वर्षमा एमालेका अध्यक्ष केपी शर्मा ओलीले कांग्रेस सभापति शेरबहादुर देउवालाई प्रधानमन्त्री पद हस्तान्तरण गर्ने र २०८४ को निर्वाचन कांग्रेसको नेतृत्वमा हुने बताएका छन्।
