काठमाडौँ: नेपालमा पछिल्लो पाँच वर्षमा ५२ हजार हेक्टरभन्दा बढी धान खेती हुने क्षेत्रफल घटेको छ। कृषि तथा पशुपन्छी विकास मन्त्रालयको तथ्याङ्क अनुसार धान बाली हुने क्षेत्रफलमा निरन्तर कमी आएको छ।
आर्थिक वर्ष २०७७/७८ मा १४ लाख ७३ हजार ४७४ हेक्टरमा धान रोपाइँ भएकोमा चालु आर्थिक वर्ष २०८१/८२ मा घटेर १४ लाख २० हजार ६३६ हेक्टरमा सीमित भएको छ। यसले ५२ हजार ८३८ हेक्टर क्षेत्रफलको कमी देखाउँछ।
यद्यपि, धान उत्पादन भने वृद्धि भएको छ। चालु आर्थिक वर्षमा ५९ लाख ५५ हजार ४७६ मेट्रिक टन धान उत्पादन भएको छ, जबकि पाँच वर्षअघि ५६ लाख २१ हजार ७१० मेट्रिक टन उत्पादन भएको थियो।
