काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले पूर्वगृहमन्त्री रमेश लेखकको पक्राउलाई प्रतिशोध र हतारको रूपमा व्याख्या गरिएकोप्रति असन्तुष्टि व्यक्त गरेका छन्।
शुक्रबार प्रतिनिधिसभाको नयाँ सभामुखका लागि उपसभापति डीपी अर्यालले मनोनयन दर्तापछि सञ्चारकर्मीसँग कुरा गर्दै उनले यस्तो धारणा राखेका हुन्। लामिछानेले लेखकको पक्राउलाई प्रतिशोधको रूपमा व्याख्या गर्नु हतारो भएको बताउँदै न्याय पाउने पहिलो अधिकार शहीद परिवार र घाइते परिवारको भएको उल्लेख गरे।
उनले भने, ‘गृहमन्त्रीको पक्राउलाई प्रतिशोध भन्नु हतार भयो। आफ्ना कलिला बालबालिका गुमाएका अभिभावकलाई न्यायको हतारो हुन्छ। त्यस्तो हतारो अरू कसैलाई हुँदैन। त्यसैले न्याय पाउने पहिलो हक शहीद परिवारको हो, घाइते परिवारको हो। न्याय पाउने अधिकार सबैलाई छ, तर प्राथमिकता उनीहरूलाई दिनुपर्छ।’
लामिछानेले आफूहरू सार्वजनिक परीक्षण (पब्लिक अडिट) मा रहेको भन्दै नागरिकले सबै गतिविधि नियालिरहेको बताए। ‘हामी पब्लिक अडिटमा छौं, नागरिकले सबै हेर्दै हुनुहुन्छ। हामीले बोलेर भन्दा काम गरेर देखाउँछौं,’ उनले भने।
उनले नवनिर्वाचित सभामुखले संसदीय मर्यादा, नियमावली र अनुशासनको कडाइका साथ पालना गर्नुपर्नेमा जोड दिए। सभामुख पदमा पुगेपछि पार्टीभन्दा माथि उठेर सम्पूर्ण सदनप्रति उत्तरदायी हुनुपर्ने उल्लेख गर्दै उनले लोकतान्त्रिक मूल्य–मान्यता विपरीत प्रतिपक्षलाई दबाउने वा नागरिकका मुद्दा ओझेलमा पार्ने व्यवहार अस्वीकार्य हुने बताए।
