महेन्द्रनगर (धनुषा): मधेस प्रदेश प्रमुख सुमित्रा सुवेदी भण्डारीले नेपाल र भारतबीच गहिरो सद्भाव र आत्मीय सम्बन्ध रहेको बताउनुभएको छ। सोमबार वीरगञ्जस्थित भारतीय महावाणिज्य दूतावासले भारतको ७६औँ गणतन्त्र दिवसका अवसरमा आयोजना गरेको कार्यक्रममा प्रमुख भण्डारीले दुई देशबीचको कूटनीतिक, धार्मिक, भाषिक, सांस्कृतिक र व्यापारिक सम्बन्धको महत्त्वलाई उजागर गर्नुभयो। उहाँले भारतको शान्ति, समृद्धि, र प्रगतिको कामना गर्दै पछिल्लो समय नेपाल–भारत सम्बन्ध थप सुदृढ भएको विश्वास व्यक्त गर्नुभयो।
मधेस प्रदेशसभाका सभामुख रामचन्द्र मण्डलले भारतको स्वतन्त्रता सङ्ग्राममा नेपालीहरूको योगदानको स्मरण गर्दै नेपाल–भारत सम्बन्धलाई अझ प्रगाढ बनाउनुपर्नेमा जोड दिनुभयो।
भारतीय महावाणिज्य दूतावासका महावाणिज्यदूत देवीसहाय मीनाले नेपालमा पूर्वाधार विकास, व्यापारलगायतका क्षेत्रमा भारतीय सरकारको निरन्तर सहयोग रहने प्रतिबद्धता व्यक्त गर्नुभयो।
कार्यक्रममा मधेस प्रदेशका गृह, सञ्चार तथा कानुनमन्त्री राजकुमार लेखी, शिक्षा तथा संस्कृतिमन्त्री रानी शर्मा तिवारी, वन तथा वातावरणमन्त्री त्रिभुवन साह, ऊर्जा तथा खानेपानीमन्त्री शेषनारायण यादव, पूर्वप्रदेश प्रमुख हरिशङ्कर मिश्र, पूर्वमुख्यमन्त्री लालबाबु राउत, प्रदेशसभा सदस्यहरू, जनकपुरधाम उपमहानगरपालिकाका प्रमुख मनोजकुमार साह र पूर्वप्रमुख बजरङ्गप्रसाद साहलगायतको उपस्थिति थियो।
