काठमाडौँ: नेपाल वायुसेवा निगम (नेपाल एयरलाइन्स) का दुईवटा ट्वीनअटर विमान आन्तरिक तर्फका नियमित उडानमा पुनः सञ्चालनमा आएका छन्।
निगमका प्रवक्ता सुवास डाँगीका अनुसार ‘कलसाइन नाइन एन–एबिटी’ र ‘नाइन एन–एबीयु’ दुवै ट्वीनअटर विमान अब पूर्ण रूपमा सञ्चालनमा छन्। लामो समयदेखि ग्राउन्ड गरिएको अवस्थामा रहेका यी विमानहरू पुनः सेवा पुनः सञ्चालनमा आउनु दुर्गम क्षेत्रका यात्रुहरूका लागि राहतको विषय बनेको छ।
प्रवक्ता डाँगीका अनुसार दुवै विमानमा नियामक निकाय तथा निर्माताको मापदण्डअनुसार आवश्यक मर्मत–सम्भार सम्पन्न गरिएको छ भने दुबैमा नयाँ इञ्जिनसमेत जडान गरिएको छ। आवश्यक नियामकीय परीक्षण सम्पन्न भएपछि वैशाख २९ गतेदेखि यी विमानहरू नियमित उडान तालिकाअनुसार सञ्चालनमा आएका हुन्।
निगमले यो पुनः सञ्चालनले दुर्गम क्षेत्रका नागरिकलाई सहज, सुलभ र मितव्ययी हवाई सेवाको पहुँचमा वृद्धि गर्ने विश्वास व्यक्त गरेको छ। जारी विज्ञप्तिमा निगमले यात्रुहरूको सुरक्षालाई उच्च प्राथमिकता दिँदै गुणस्तरीय सेवा प्रदान गर्न प्रतिबद्ध रहने उल्लेख गरिएको छ।
प्रवक्ता डाँगीले हरेक दिन कम्तीमा एक ट्वीनअटर विमानबाट चार उडान सञ्चालन गर्ने लक्ष्यसहित नयाँ तालिका तयार पारिएको र आन्तरिक उडानलाई थप प्रभावकारी बनाइने जानकारी पनि दिए।
