त्रिशूली (नुवाकोट): नेपाली कांग्रेसका प्रवक्ता डा. प्रकाशशरण महतले नेपाली कांग्रेस विधि र नीतिमा दृढ रहेको बताउनुभएको छ। नुवाकोटको पञ्चकन्या–४ घ्याङस्वारामा नेपाल तरुण दल, नुवाकोट क्षेत्र नं १ द्वारा आयोजित ‘नेपाली कांग्रेसको एकसय दिने कार्यक्रम’ अन्तर्गत प्रशिक्षण कार्यक्रममा बोल्दै, उहाँले पार्टीका संस्थापक नेताहरूको त्याग र योगदानले निर्माण गरेको विधि र नीतिले कांग्रेसलाई मुलुकको भरपर्दो पार्टीको रूपमा स्थापित गर्न सफल बनाएको उल्लेख गर्नुभयो।
डा. महतले अन्य पार्टीहरूमा नेतृत्वमाथि प्रश्न उठाउँदा कारबाही, निलम्बन र निष्कासन हुने गरेको तर कांग्रेसमा वाक–स्वतन्त्रता, लोकतान्त्रिक अभ्यास, र विधिको शासनको कारण यस्तो समस्या नदेखिएको दाबी गर्नुभयो। उहाँका अनुसार पार्टीले नीति र लोकतान्त्रिक पद्दतिलाई उच्च प्राथमिकता दिएको छ।
प्रशिक्षण कार्यक्रममा प्रतिनिधिसभा सदस्य सीता मिजार, कांग्रेस नुवाकोट सभापति रमेशकुमार महत, नेता डा. केदारनरसिंह केसी, कांग्रेस बागमती प्रदेशका प्रवक्ता तिलक रुवाली, रसुवा कांग्रेस सभापति प्रभात तामाङ, र तरुण दल क्षेत्रीय अध्यक्ष शरण घलेलगायत नेताहरूले युवाको सहभागिता बढाउन भातृ संस्थाहरूलाई सक्रिय बनाउनुपर्नेमा जोड दिनुभयो।
नेताहरूले पार्टीभित्र कार्यकर्ता उत्पादनका लागि नेपाल विद्यार्थी संघ र तरुण दललाई ‘नर्सरी’को रूपमा विकसित गर्दै सदस्य संख्या बढाउन विशेष ध्यान दिनुपर्ने धारणा व्यक्त गर्नुभयो।
उहाँहरूले पार्टीको संगठनलाई अझ सशक्त बनाउँदै कांग्रेसलाई आगामी दिनमा थप उचाइमा पुर्याउने आवश्यकता औंल्याउनुभयो।
