काठमाडौँ । नेपाली कम्युनिस्ट पार्टी (नेकपा) को केन्द्रीय संयोजन समितिको बैठक आज (सोमबार) बस्दै छ।
पार्टी केन्द्रीय कार्यालय पेरिसडाँडामा दिउँसो १ बजे बस्ने यस बैठकमा संयोजक पुष्पकमल दाहाल ‘प्रचण्ड’ र सह–संयोजक माधवकुमार नेपालले तयार पारेको विशेष निर्णय प्रस्ताव पेस हुने कार्यक्रम रहेको छ।
नेता प्रकाश ज्वालाका अनुसार आजको बैठकले नेताहरूको कार्यविभाजन, विभागीय जिम्मेवारी तथा सचिवालय र केन्द्रीय कार्य समितिलाई पूर्णता दिने विषयमा ठोस निर्णय लिने सम्भावना रहेको छ।
बैठकमा चुनावी समीक्षा प्रतिवेदनको अनुमोदन र सांगठनिक जिम्मेवारीको बाँडफाँट सम्बन्धी प्रस्तावहरू पनि प्रस्तुत हुनेछन्। यसअघि वैशाख ३ गतेको बैठकमा उठेका प्रश्नहरूको जवाफ दिने गरी संयोजक र सह–संयोजकलाई निर्णय प्रस्ताव तयार गर्ने जिम्मेवारी दिइएको थियो, जसलाई आज अनुमोदन गर्ने तयारी छ।
सांगठनिक संरचनाअन्तर्गत प्रदेश इन्चार्ज, सह–इन्चार्ज, संयोजक र सह–संयोजकको जिम्मेवारी वरिष्ठ नेताहरूबाटै तोक्ने तयारी गरिएको छ। जिम्मेवारी बाँडफाँट गर्दा साविकका दुई पार्टी—माओवादी केन्द्र र एकीकृत समाजवादी—बीच सन्तुलन कायम गर्ने मापदण्ड अपनाइनेछ। त्यसअनुसार एक पक्षले इन्चार्ज पाएको प्रदेशमा अर्को पक्षले सह–इन्चार्ज पाउने व्यवस्था गरिनेछ। यसैगरी ३२ वटा विभागहरूमा प्रमुख र उपप्रमुखको जिम्मेवारी पनि बाँडफाँट गरिनेछ।
बैठकले विधानअनुसार १२५ सदस्यीय केन्द्रीय सचिवालय र ६०१ सदस्यीय केन्द्रीय कार्य समितिलाई पूर्णता दिने प्रस्तावमाथि पनि छलफल गर्नेछ। तल्लो तहका पालिका र जिल्लाको एकता तथा समायोजनको जिम्मा सम्बन्धित प्रदेशलाई दिने तयारी छ।
यसका साथै, जनवर्गीय संगठन र मोर्चाको एकता, सदस्यता नवीकरण तथा एकताको मापदण्डका विषयमा पनि आज निर्णय हुन सक्ने बताइएको छ।
पार्टीको आगामी कार्यदिशा र महाधिवेशनका सम्बन्धमा पनि बैठक निर्णायक हुने देखिएको छ। ६ महिनाभित्र एकता महाधिवेशन सम्पन्न गर्ने लक्ष्यका साथ वडा तहदेखि अधिवेशन प्रक्रिया अघि बढाउने र महाधिवेशनको मिति तय गर्ने सम्भावना रहेको नेता ज्वालाले बताएका छन्।
