दोहा । कतारको राजधानी दोहामा कतार र पाकिस्तानको मध्यस्थतामा भएको अमेरिका र इरानबीचको अप्रत्यक्ष वार्ताको एक चरण सकारात्मक रूपमा सम्पन्न भएको छ। वार्ताको मुख्य उद्देश्य हालैको सैन्य तनावपछि खाडी क्षेत्रमा तनाव कम गर्दै कूटनीतिक संवादलाई निरन्तरता दिनु रहेको जनाइएको छ।
मध्यस्थकर्ताहरूका अनुसार दुवै पक्षबीच विभिन्न विषयमा रचनात्मक छलफल भएको छ। गत जुनमा कतार र पाकिस्तानकै पहलमा अमेरिका र इरानबीच प्रारम्भिक समझदारी भएको थियो, जसमा अस्थायी युद्धविराम र रणनीतिक हर्मुज जलडमरूमध्यमा जहाज आवतजावत सहज बनाउने विषय समेटिएको थियो।
दोहा वार्तामा उक्त समझदारीको कार्यान्वयन, हर्मुज जलडमरूमध्यको व्यवस्थापन तथा भविष्यका कूटनीतिक प्रक्रियाबारे छलफल भएको बताइएको छ। साथै, इरानको आणविक कार्यक्रम, प्रतिबन्ध, पुनर्निर्माण तथा अन्य दीर्घकालीन विषयलाई आगामी चरणका वार्तामा विस्तृत रूपमा उठाइने सहमति भएको छ।
इरानी प्रतिनिधिमण्डलका प्रमुख काजेम गारिबाबादीले समझदारी कार्यान्वयनको निगरानीका लागि सञ्चार संयन्त्र स्थापना गर्ने विषयमा सहमति भएको जानकारी दिएका छन्। साथै, रोक्का रहेका इरानी सम्पत्तिको एक हिस्सा मानवीय तथा अत्यावश्यक सामग्री खरिदका लागि प्रयोग गर्ने विषयमा पनि छलफल भएको जनाइएको छ।
अमेरिकी राष्ट्रपति डोनाल्ड ट्रम्पले पनि वार्ताप्रति सकारात्मक प्रतिक्रिया दिँदै इरानको आणविक निशस्त्रीकरणसम्बन्धी प्रक्रिया सही दिशामा अघि बढिरहेको बताएका छन्।
मध्यस्थकर्ताहरूका अनुसार अर्को चरणको अप्रत्यक्ष वार्ता इरानका सर्वोच्च नेता अयातोल्लाह अली खामेनीको अन्त्येष्टि सम्पन्न भएपछि आयोजना गर्ने तयारी गरिएको छ। दुवै पक्षले संवादलाई निरन्तरता दिने प्रतिबद्धता व्यक्त गरेका छन्।
यसबीच, खाडी क्षेत्रमा तनाव पूर्ण रूपमा अन्त्य नभए पनि हाल सैन्य गतिविधि केही कम भएको बताइएको छ। हर्मुज जलडमरूमध्यको सुरक्षा, क्षेत्रीय स्थायित्व तथा लेबनानसँग सम्बन्धित विषयहरू आगामी वार्ताका महत्वपूर्ण एजेन्डा रहने जनाइएको छ।
