काठमाडौँ, २३ जेठ— हिमालयन मुलुकहरूबीच दिगो पर्यटन प्रवर्द्धनका लागि समन्वयात्मक रणनीति आवश्यक रहेको निष्कर्षसहित पाँचौँ संस्करणको अन्तरराष्ट्रिय पर्यटन मेला ‘हिमालयन ट्राभल मार्ट (HTM)’ बिहीबार काठमाडौँमा सम्पन्न भएको छ।
जेठ २० देखि २२ गतेसम्म आयोजना गरिएको यस मेलाले विश्वव्यापी पर्यटन तथा आतिथ्य क्षेत्रका संस्थाहरू, व्यवसायी, विज्ञ र सरोकारवालाबीच सञ्जाल विस्तार गर्दै पर्यटन उद्योगमा नयाँ व्यावसायिक अवसर र अन्तरदृष्टिलाई प्रवर्द्धन गर्ने उद्देश्य राखिएको थियो।
मेलाको आयोजना प्यासिफिक एसिया ट्राभल एसोसिएसन (PATA) नेपाल च्याप्टर र नेपाल पर्यटन बोर्डले नेपाल वायुसेवा निगमलगायत पर्यटन क्षेत्रका प्रमुख संघसंस्थाहरू र राष्ट्रिय तथा अन्तरराष्ट्रिय साझेदारहरूको सहकार्यमा गरेका हुन्।
HTM 2024 मा ३० भन्दा बढी देशबाट १०० भन्दा बढी अन्तरराष्ट्रिय प्रतिनिधि तथा नेपालका पर्यटनकर्मी, व्यवसायी र सरोकारवालासहित ७०० जना सहभागी थिए।
समापन समारोह र प्रस्तुतिहरू
मेलाको समापन काठमाडौँको ठमेलस्थित LOD नाइट क्लबमा एक विशेष सांगीतिक कार्यक्रमसहित सम्पन्न गरिएको थियो। कार्यक्रममा डिजे प्रस्तुति र सांगीतिक सांस्कृतिक झल्को प्रस्तुत गरिएको थियो। समापनमा PATA नेपाल च्याप्टर अध्यक्ष खेम लकाई, नेपाल वायुसेवा निगमका संस्थागत निर्देशक अनिल घिमिरे, नेपाल पर्यटन बोर्डका वरिष्ठ अधिकारीहरू, पर्यटन व्यवसायीहरू तथा अन्तरराष्ट्रिय पाहुनाहरूको उपस्थिति थियो।
सम्मेलन र छलफलका विषयहरू
‘Mountain Milestone and Momentum’ विषयमा आयोजित सम्मेलनमा आध्यात्मिक, साहसिक, लक्जरी र दिगो पर्यटनबारे समूहगत छलफलहरू गरिएका थिए। राष्ट्रिय तथा अन्तरराष्ट्रिय २० भन्दा बढी वक्ता र विचारकहरूले पर्यटनका समसामयिक चुनौती, बजार प्रवृत्ति, तथा उदीयमान अवसरहरूबारे विचार साझा गरे।
बोल्ने वक्ताहरूले नेपालको अनुपम प्राकृतिक सौन्दर्य र पर्यटकीय सम्भावनालाई अन्तरराष्ट्रिय बजारमा प्रस्तुत गर्न एकीकृत प्रयास र सहकार्य आवश्यक रहेकोमा जोड दिए।
HTM संयोजक एवं PATA महासचिव नरेन्द्रदेव भट्टले मेलाको उद्देश्य नेपाललाई अन्तरराष्ट्रिय बजारमा सशक्तरूपमा प्रवर्द्धन गर्नु रहेको स्पष्ट पार्नुभयो। उहाँले सन् २०१७ देखि हरेक वर्ष जुन महिनामा आयोजना हुँदै आएको HTM लाई नेपालको प्रमुख अन्तरराष्ट्रिय पर्यटन व्यापार मेलाका रूपमा स्थापित गराइएको बताउनुभयो।
B2B कार्यक्रम र सहभागिता
B2B कार्यक्रमअन्तर्गत यस वर्ष HTM मा संयुक्त राज्य अमेरिका, युरोप, अष्ट्रेलिया, दक्षिण अफ्रिका, रसिया तथा CIS राष्ट्रहरूबाट ६० भन्दा बढी क्रेता (Buyers) र नेपाल, भारत, भुटान, चीन, बङ्गलादेश र श्रीलङ्काका ६५ भन्दा बढी विक्रेता (Sellers) सहभागी भएको जानकारी आयोजक PATA नेपाल च्याप्टरले दिएको छ।
