काठमाडौँ । त्रिभुवन विश्वविद्यालयका उपकुलपतिसहित तीन उच्च पदाधिकारीले राजीनामा दिएका छन्। कुलपति समेत रहेका प्रधानमन्त्री बालेन शाहसमक्ष उपकुलपति दीपक अर्याल, रेक्टर खड्ग केसी र रजिस्टार केदारप्रसाद रिजालले राजीनामा बुझाएका हुन्।
रेक्टर केसीका अनुसार बिहीबार उनीहरूले औपचारिक रूपमा राजीनामा पठाएका हुन्। सरकारले विश्वविद्यालयका पदाधिकारीलगायत राजनीतिक नियुक्ति पाएका अधिकारीहरूलाई हटाउने गरी अध्यादेश सिफारिस गरेको सन्दर्भमा पदमा बसिरहन उचित नलागेकाले राजीनामा दिएको उनले बताएका छन्।
राजीनामा दिने तीनै जना पूर्व प्रधानमन्त्रीहरूको कार्यकालमा नियुक्त भएका थिए। उपकुलपति अर्याल केपी शर्मा ओलीको कार्यकालमा नियुक्त भएका थिए भने रेक्टर केसी र रजिस्टार रिजाल प्रचण्ड नेतृत्वको सरकारको समयमा नियुक्त भएका थिए।
