कर्णाली: कर्णाली प्रदेश सरकारले आगामी आर्थिक वर्ष २०८२/८३ भित्र प्रदेशलाई पूर्ण रूपमा तुइनमुक्त बनाउने घोषणा गरेको छ।
प्रदेशको नीति तथा कार्यक्रम सार्वजनिक गर्दै सरकारले अब तुइन विस्थापन गरी झोलुङ्गे पुल निर्माणमा जोड दिने बताएको हो। भौतिक पूर्वाधार तथा सहरी विकास मन्त्रालयले आज एक सूचना प्रकाशित गर्दै असार १० गतेभित्र तुइनको विवरण पठाउन सबै जिल्ला र पालिकालाई आग्रह गरेको छ।
सूचनामा भनिएको छ, “यदि प्रदेशका नदी–खोलामा हाल पनि तुइन सञ्चालनमा रहेका छन् भने ती विस्थापित गरी झोलुङ्गे पुल निर्माणका लागि सम्बन्धित जिल्लाको पूर्वाधार विकास निर्देशनालय वा मन्त्रालयमा सोझै वा इमेलमार्फत निवेदन दिनुहुन सरोकारवालालाई जानकारी गराइन्छ।”
मुख्यमन्त्री यामलाल कँडेलले प्रदेश सरकारको नीति तथा कार्यक्रम भौगोलिक रूपले विकट र विकासको दृष्टिले पछि परेका कर्णालीवासीको आवागमन सहज बनाउनेतर्फ केन्द्रित रहेको बताउनुभयो। उहाँले “नागरिकलाई राज्यको उपस्थिति महसुस हुने गरी” सरकार काम गर्ने प्रतिबद्धता जनाउनुभयो।
