म्याग्दी: ट्र्याक खुलेको १४ वर्षपछि म्याग्दीको मालिका गाउँपालिका अन्तर्गत दरवाङ–बिम–दिच्याम सडक स्तरोन्नति थालिएको छ। गण्डकी प्रदेश सरकारको बजेटमा पूर्वाधार विकास कार्यालय म्याग्दीले खारा–बिम–डाडाँगाउँ खण्डमा स्तरोन्नतिको काम अघि बढाएको हो।
गत असार महिनामा रु ११ करोड १९ लाख ९० हजारको ठेक्का सम्झौता भएको यो आयोजनाको जिम्मा सर्वशक्ति महामाया प्रालि ले पाएको छ। प्रारम्भिक चरणको काम सुरु भइसकेको र हालसम्म करिब १५ प्रतिशत प्रगति भएको पूर्वाधार विकास कार्यालयले जानकारी दिएको छ।
पुरानो सडक, नयाँ विस्तार
विसं २०६८ मा तत्कालीन जिल्ला विकास समिति (जिविस), बिम गाविस र स्थानीयको चन्दा संकलनबाट खारादेखि बिम जोड्ने करिब सात किलोमिटर सडक निर्माण गरिएको थियो। अहिलेको स्तरोन्नतिमा त्यो सडकलाई तीन दशमलब पाँचदेखि पाँच मिटर फराकिलो बाटोबाट सात मिटर फराकिलो बनाइनेछ। साथै, नाली, पर्खाल, ढलान, ग्राभेल र कालोपत्रे कार्यसमेत गरिनेछ।
पूर्वाधार विकास कार्यालयका प्रमुख विष्णु पौडेलका अनुसार, दरवाङदेखि खारासम्मको सडकमा निर्माणाधीन जलविद्युत् आयोजनाका भारी उपकरण ओसारपसार हुने भएकाले त्यो सडक क्षतिग्रस्त बन्ने गरेको छ। त्यसैले वैकल्पिकरूपमा खारादेखि बिम हुँदै डाडाँगाउँसम्मको खण्डमा स्तरोन्नतिको आयोजना सञ्चालन गरिएको हो।
बहुवर्षीय योजना र बजेट
गण्डकी प्रदेशसभा सदस्य रेशमबहादुर जुग्जालीका अनुसार, आफूले भौतिक पूर्वाधार विकास तथा यातायात मन्त्रालय सम्हाल्दा रु ४ करोड विनियोजन गरेर बहुवर्षीय ठेक्काको लागि आवश्यक रु २० करोड बराबरको बजेट सुनिश्चित गरिएको थियो। यद्यपि, चालु आर्थिक वर्षमा मात्र रु १ करोड ५० लाख विनियोजन भएको छ।
शनिबार सडकको अनुगमन गरेका सांसद जुग्जालीले निर्माण व्यवसायीलाई काममा तीव्रता दिन निर्देशन दिएका छन्। लुरवाङ–तल्लो गाउँ खण्डमा अहिले भित्तो काटी सडक फराकिलो बनाउने र टेवा पर्खाल निर्माणको काम भइरहेको छ।
स्थानीय र पर्यटकका लागि लाभदायक
खाराका स्थानीय बुद्धी जुग्जालीका अनुसार, यो सडक स्तरोन्नतिले मालिका गाउँपालिका–७ को साविक बिम गाविस, धवलागिरि गाउँपालिका–५ मल्कवाङ र –६ मराङ तथा मालिका–६ दिच्यामका बासिन्दा प्रत्यक्ष लाभान्वित हुनेछन्।
सडक स्तरोन्नतिले धार्मिक तथा पर्यटकीयस्थल मालिका धुरी, प्रभुचेला, बिम बराह ताल घुम्न र दर्शन गर्न आउने भक्तजन र पर्यटकलाई पनि सहज हुनेछ। साथै, सुन्तला, आलु जस्ता कृषि उपजको बजारमा पहुँच, दैनिक आवतजावत, र बसाइँसराइ न्यूनीकरणमा समेत सहयोग पुग्ने अपेक्षा गरिएको छ।
