गुइलिन (चीन): नेपाल–चीनबीच पर्यटन, कला र सांस्कृतिक प्रवर्द्धनका उद्देश्यले यहाँ एक भव्य सांगीतिक तथा पुरस्कार वितरण कार्यक्रम सम्पन्न भएको छ। तेस्रो एसएमएस नेपाल–चीन सांस्कृतिक संरक्षण तथा पर्यटन प्रवर्द्धन सम्मान तथा पुरस्कार, २०८१ गएराति गुइलिनमा सम्पन्न भएको हो।
कार्यक्रम एसएमएस म्युजिक एण्ड इन्टरटेन्मेन्ट को आयोजनामा, चङ्दोंसी गुइलिन फुक्सी एसेट म्यानेजमेन्ट र गुइलिन एलाइट एजुकेशन कन्सल्टिङ को सहआयोजनामा सम्पन्न भयो।
नेपाली र चिनियाँ कलाकारहरूको आकर्षक प्रस्तुति
कार्यक्रममा नेपालका देविका वन्धन, कमल खत्री, तथा राष्ट्रिय गतिशील कला समूह लगायतका कलाकारहरूले विशेष सांगीतिक प्रस्तुति दिएका थिए। चिनियाँ कलाकारहरूले पनि आफ्ना मौलिक नृत्य र गीत प्रस्तुत गरेर दर्शकलाई मन्त्रमुग्ध पारे।
मित्रता प्रवर्द्धनको सेतु
एसएमएस म्युजिक एण्ड इन्टरटेन्मेन्टका अध्यक्ष सत्यकला तामाङ लामाले नेपाल–चीन मित्रता, संस्कृति, कला र पर्यटन प्रवर्द्धनको सेतुका रूपमा यस कार्यक्रमलाई मूल्यांकन गर्नुभयो। “नेपालको आवाज र पहिचानलाई अन्तर्राष्ट्रिय मञ्चमा पुर्याउने हाम्रो प्रयास यही कार्यक्रममार्फत साकार बन्दैछ,” उहाँले बताउनुभयो।
ऐतिहासिक सम्बन्ध र सामाजिक परिवर्तन
सोलुखुम्बुको थुलुङ दूधकोसी गाउँपालिकाका अध्यक्ष असिम राईले नेपाल–चीनबीचको ऐतिहासिक, धार्मिक र सांस्कृतिक सम्बन्धको चर्चा गर्दै अरनिको र भृकुटीले पुर्याएको योगदान स्मरण गर्नुभयो। उहाँले जनताको भावना र आकाङ्क्षाको प्रतिनिधित्व गर्न पाएकोमा गर्व व्यक्त गर्दै मित्रता अझ प्रगाढ बन्दै गएको उल्लेख गर्नुभयो।
चिनियाँ अधिकारीहरूको सहभागिता
कार्यक्रममा गुइलिन संयुक्त मोर्चा कार्यविभागका मन्त्री ब्लाङ सिएन फिङ, गुइलिन सांस्कृतिक स्वयंसेवक संघका अध्यक्ष लिनबिन, उपनिर्देशक झाङ गाओलियन, ग्लोरी कज प्रमोशन एशोसिएसनका उपाध्यक्ष याङ युनवु, फुक्सी एसेट म्यानेजमेन्टका अध्यक्ष चेन होङसियान, र लिजियाङ उद्धार केन्द्रका कप्तान मो गुआङफु लगायतको उपस्थिति रहेको थियो।
सगरमाथा आरोहण र अवार्ड सम्मान
विश्वका ८,००० मिटरभन्दा अग्ला हिमाल ३३ पटक सफलतापूर्वक आरोहण गरेका मिड्ना डेम्ब शेर्पाले हिमाल आरोहणमार्फत पर्यटन प्रवर्द्धनको सम्भावनाबारे चर्चा गर्नुभयो।
कार्यक्रममा देविका वन्धनलाई “इमर्जिङ सिङ्गर अवार्ड” र कमल खत्रीलाई “उत्कृष्ट गायक पुरस्कार” प्रदान गरिएको थियो।
सांस्कृतिक सम्बन्धलाई नयाँ उचाइ
कार्यक्रमका प्रबन्ध निर्देशक थुप्तेन ग्याल्बो मोक्तानले नेपाल–चीन सांस्कृतिक सम्बन्धलाई मजबुत बनाउन यस्ता कार्यक्रम महत्त्वपूर्ण हुने बताउनुभयो। “हाम्रो संगीत, कला र संस्कृतिको अन्तर्राष्ट्रिय प्रस्तुति दुवै देशबीचको समझदारीलाई अझ सुदृढ बनाउने विश्वास लिएका छौं,” उहाँले भन्नुभयो।
