वीरगञ्ज (पर्सा): अत्यधिक चिसो बढेसँगै वीरगञ्ज महानगरपालिकाले तीन दिनका लागि विद्यालयको पठनपाठन स्थगित गर्ने निर्णय गरेको छ। पुस २४ देखि २६ गतेसम्म महानगरभित्रका सामुदायिक र संस्थागत विद्यालयमा जाडो बिदा दिइनेछ।
महानगरका शिक्षा अधिकृत हरि राउतले सार्वजनिक सूचना जारी गर्दै, विद्यार्थीको स्वास्थ्यमा चिसोका कारण पर्न सक्ने प्रतिकूल प्रभावलाई ध्यानमा राखी यो निर्णय गरिएको जानकारी दिनुभयो। सूचनामा भनिएको छ, “तीन दिनको जाडो बिदा वर्षे बिदाबाट कटौती हुनेगरी विद्यालयको प्रशासनिक कार्य भने सञ्चालन हुनेछ। विद्यार्थीलाई गृहकार्य प्रदान गरी घरमा अध्ययनको वातावरण मिलाउन सम्बन्धित विद्यालयहरूलाई अनुरोध गरिएको छ।”
यसैगरी, पर्सागढी नगरपालिकाले पुस २१ मा सार्वजनिक सूचना जारी गर्दै पुस २२ देखि माघ १ गतेसम्म सामुदायिक तथा संस्थागत विद्यालयहरूमा जाडो बिदा दिने निर्णय गरिसकेको छ। शिक्षा शाखा प्रमुख देवकुमार गिरीका अनुसार, चिसोले बालबालिकाको स्वास्थ्यमा पर्न सक्ने असरलाई मध्यनजर गर्दै यो कदम चालिएको हो।
पछिल्ला दिनमा बाक्लो हुस्सु लाग्ने क्रम जारी रहेकाले विद्यालय बन्दले विद्यार्थीलाई केही राहत पुग्ने अपेक्षा गरिएको छ।
