काठमाडौँ: नेपाली कांग्रेसका सभापति एवं पूर्वप्रधानमन्त्री शेरबहादुर देउवाले नेपालमा हरेक चाडपर्वलाई सबैले आदर र सम्मान गर्ने आफ्नै सद्भावयुक्त परम्परा रहेको उल्लेख गर्नुभएको छ।
ग्याल्पो ल्होसारको अवसरमा शुभकामना व्यक्त गर्दै उहाँले नेपालका विभिन्न जातजातिका विशिष्ट परम्परा, रहनसहन, रीतिरिवाज र चाडपर्व रहेको बताउनुभयो। तीमध्ये आदिवासी शेर्पा समुदायसहित उत्तरी हिमाली भेगका विभिन्न समुदायले मनाउने ग्याल्पो ल्होसार (नयाँ वर्ष) एक महत्वपूर्ण पर्व भएको उहाँले उल्लेख गर्नुभयो।
नेपाल बहुजातीय, बहुभाषिक, बहुसांस्कृतिक र बहुधार्मिक विशेषताले भरिएको सुन्दर देश भएको उल्लेख गर्दै सभापति देउवाले ग्याल्पो ल्होसार सम्पूर्ण नेपालीका लागि सुख, शान्ति र समृद्धिको वर्ष बनोस् भनी शुभकामना व्यक्त गर्नुभएको छ।
