अमेरिकी कलाकार लिन्डी बिशपको “MADE OF SAME” कला प्रदर्शनी २५ अप्रिलदेखि ललितपुरमा
काठमाडौं, वैशाख ८ — ग्यालेरी एमक्युबले समकालीन अमेरिकी कलाकार लिन्डी बिशप का कलाकृति समेटिएको विशेष कला प्रदर्शनी “MADE OF SAME” आयोजना गर्न लागेको छ। प्रदर्शनी २५ अप्रिलदेखि २९ अप्रिल २०२५ (वैशाख १३–१७) सम्म ग्यालेरी एमक्युब, ललितपुरमा सञ्चालन हुनेछ।
यो प्रदर्शनी एमक्युब इन्टरनेशनल आर्टिस्ट्स रेसिडेन्सी २०२५ अन्तर्गत नेपाल आएकी बिशपको सिर्जनाको प्रस्तुति हो। उद्घाटन समारोह वैशाख १३ गते (२५ अप्रिल), साँझ ५ बजे आयोजना हुने जानकारी ग्यालेरीले दिएको छ। प्रदर्शनी प्रत्येक दिन बिहान ११ बजेदेखि साँझ ७ बजेसम्म सर्वसाधारणका लागि खुला हुनेछ।
कलाकार लिन्डी बिशप र उनका अभिव्यक्ति
लिन्डी बिशप एक आत्मशिक्षित समकालीन इम्प्रेशनिस्ट चित्रकार हुन्। उनले ग्रामीण भूदृश्य, जनजीवन, संस्कार, प्रकृति र आशा जस्ता विषयलाई आफ्ना चित्रमार्फत उजागर गर्ने गर्छिन्। यथार्थवाद र अमूर्तताबीचको सीमामा काम गर्ने बिशपको चित्रशैलीमा रंग र आकारको गहिरो समकालीन अभिव्यक्ति पाइन्छ।
नेपाल भ्रमण तथा रेसिडेन्सीका क्रममा उनले हिमाली भूगोल, उद्यमशीलता, बालबालिका, ढाका कपडाका ढाँचाहरू र जीवनसंघर्ष बाट प्रेरणा लिएकी छिन्। उनले हालै ग्यालेरी एमक्युबको स्टुडियोमै आफ्ना कलाकृति निर्माण गरिरहेकी छन्, जुन प्रदर्शनीमार्फत सार्वजनिक गरिनेछ।
सहभागिताको निम्तो र प्रदर्शनीको उद्देश्य
ग्यालेरी एमक्युबका संस्थापक निर्देशक तथा बहु-आयामिक कलाकार मनीष लाल श्रेष्ठ ले सबै कलाप्रेमीहरूलाई कार्यक्रममा सहभागी हुन आग्रह गरेका छन्। उनका अनुसार, “MADE OF SAME” ले हामी सबैलाई बाँध्ने साझा मानवीय धागोको अनुभूति दिलाउनेछ।
उनले भने, “यो प्रदर्शनीले कला र मानवता बीचको गहिरो सम्बन्ध झल्काउँछ। हामी सबै एउटै तत्वबाट बनेका छौं भन्ने सन्देश दिन्छ।”
प्रदर्शनीले नेपाली कला क्षेत्रलाई अन्तर्राष्ट्रिय कलाकारसँग साक्षात्कार गराउने मात्र नभई सौन्दर्य, विविधता र सहानुभूति जस्ता भावनाहरूलाई प्रोत्साहन गर्ने अपेक्षा गरिएको छ।
