काठमाडौं । गृहमन्त्री सुदन गुरुङको निर्देशनमा पछिल्लो समय सुरक्षा निकायले आपराधिक गतिविधिविरुद्ध आक्रामक कारबाही तीव्र बनाएको छ। यसै क्रममा गुण्डागर्दीमा संलग्न ‘सानुभाइ’ भनेर चिनिने युवराज गुरुङसहित १८ जनालाई प्रहरीले नियन्त्रणमा लिएको छ।
जिल्ला प्रहरी परिसर काठमाडौंका अनुसार सानुभाइलाई गएराति सामाखुसी क्षेत्रबाट पक्राउ गरिएको हो। प्रहरीले शुक्रबार रातिदेखि काठमाडौंमा गुण्डागर्दीविरुद्ध विशेष अभियान सञ्चालन गरेको थियो, जसअन्तर्गत सोही राति अन्य १७ जनालाई पनि पक्राउ गरिएको थियो।
नुवाकोटको ककनी गाउँपालिका–५ घर भई हाल टोखास्थित सूर्यदर्शन हाइटमा बस्दै आएका ३३ वर्षीय सानुभाइ यसअघि पनि आपराधिक गतिविधिमा संलग्न भई पक्राउ परेका थिए। तर, पछि छुटेका थिए।
