काठमाडौँ: प्रधानमन्त्री केपी शर्मा ओलीले झापाको भद्रपुर नगरपालिका–८ स्थित गिरिजाप्रसाद कोइराला सभागृहको निर्माण कार्य अघि बढाउने प्रतिबद्धता व्यक्त गरेका छन्।
प्रधानमन्त्री निवास, बालुवाटारमा आज नेपाली कांग्रेसका नेता एवं राष्ट्रिय सभाका सांसद कृष्णप्रसाद सिटौला, भद्रपुरका नगरप्रमुख गणेश पोखरेलसहितको प्रतिनिधिमण्डलले निर्माण अलपत्र परेको विषयमा ज्ञापनपत्र बुझाएपछि प्रधानमन्त्री ओलीले निर्माण कार्य पुनः सञ्चालन गर्ने प्रतिबद्धता जनाएका हुन्।
प्रतिनिधिमण्डलले नगरसभाको निर्णयसहित विभिन्न विकल्प प्रस्ताव गर्दै निर्माण कार्य अघि बढाउन आग्रह गरेको थियो।
साविक जिल्ला विकास समितिबाट दुई वर्षभित्र सम्पन्न गर्ने लक्ष्यसहित ठेकेदार कम्पनीसँग सम्झौता भए पनि पटकपटक अवधि थपिनुका साथै बजेट र कानुनी जटिलताका कारण निर्माण कार्य अलपत्र परेको थियो।
पूर्वप्रधानमन्त्री एवं नेपाली कांग्रेसका पूर्वसभापति गिरिजाप्रसाद कोइरालाको नाममा निर्माण भइरहेको यो सभागृह २०७२ असार २८ गते तत्कालीन प्रधानमन्त्री सुशील कोइरालासहित प्रमुख तीन दलका शीर्ष नेताले शिलान्यास गरेका थिए।
