काठमाडौँ: चर्चित गायिका एलिना चौहानले काठमाडौँ जिल्ला अदालतमा सम्बन्धविच्छेदको मुद्दा दायर गरेकी छन्। उनले वारेस विष्णुप्रसाद खरेलमार्फत कानुनी प्रक्रिया अघि बढाएकी हुन्।
एलिनाले गत वैशाखमा बागलुङ निवासी विष्णु सापकोटासँग विवाह गरेकी थिइन्। तर पछिल्लो समय उनका वैवाहिक सम्बन्धमा समस्या रहेको चर्चा हुँदै आएको थियो।
अदालतमा दायर निवेदनमा एलिनाले आफ्नो पेशागत जीवनका कारण विभिन्न चुनौती भोग्नु परेको खुलासा गरेकी छन्। कलाकारिताका कार्यक्रमहरूमा राति अबेरसम्म सहभागी हुनुपर्ने परिस्थितिले पतिबाट शंका र उपशंका खेप्नुपरेको उनको भनाइ छ।
एलिनाले विवाहपछि केही समय पतिसँग अस्ट्रेलियामा बसेको तर सम्बन्धमा खटपट आएपछि नेपाल फर्किएको उल्लेख गरेकी छन्।
भावनात्मक सम्बन्ध कायम नरहेपछि कागजी सम्बन्ध मात्र टिकाउन उचित नदेखिएको भन्दै उनले सम्बन्धविच्छेदको माग गर्दै मुद्दा हालेकी हुन्।
