तुलसीपुर (दाङ),२३ जेठ— तुलसीपुर उपमहानगरपालिका–१२ को लामीडाँडा र हरिपौरी क्षेत्रमा सडक कालोपत्र भएपछि स्थानीयको दैनन्दिन जीवनमा ठुलो सहजता आएको छ। पहिले पानी परे हिलाम्मे र घाम लाग्दा धुलाम्मे बन्ने यी सडकहरू अब सहज आवागमनका लागि उपयोगी बनेका छन्।
लामीडाँडाका स्थानीय नन्दकुमार पुन भन्छन्, “पहिले हिलैहिलो हुन्थ्यो, साइकलै लैजान सकिँदैनथ्यो। अहिले भने सजिलै साइकल चढेर बजार पुगिन्छ।” सडक नहुँदा गाडीले उडाएको धुलो घरभित्रै पस्ने, सुकाएका लुगा फोहोर हुने अवस्था थियो। तर अहिले त्यो समस्या हटेको स्थानीय देवी थापा बताउनुहुन्छ, “धुलोले घरमै सास्ती हुन्थ्यो, लुगाफाटा सबै धुलो लाग्थ्यो, अहिले त घर सफा राख्न सजिलो भएको छ।”
लामीडाँडामा आठ सय मिटर र हरिपौरीमा साढे तीन सय मिटर सडक कालोपत्र गरिएको छ। हरिपौरीमा पहिले वर्षायाममा कम्मरसम्म हिलो हुने र घरहरू डुबानमा पर्ने समस्या थियो। अहिले भने नालीसहित कालोपत्र सडक निर्माणपछि समस्या हटेको स्थानीय डिला केसी बताउनुहुन्छ, “पहिले त घरभित्रै पानी पर्थ्यो, अहिले भने नाली र सडक दुवै बनेपछि सहज भएको छ।”
यी दुई सडकका लागि नगरपालिकाले चालु आर्थिक वर्षको नगरस्तरीय बजेटबाट करिब रु ८६ लाख विनियोजन गरेको वडाध्यक्ष खुसीराम चौधरीले जानकारी दिनुभयो। “वडाले प्राथमिकताको आधारमा बजेट व्यवस्थापन गरेको हो,” उहाँले भन्नुभयो, “गाउँगाउँमा सन्तुलित विकास सुनिश्चित गर्न सडक स्तरवृद्धि र कालोपत्र गर्ने काम अघि बढाइएको छ।”
वडाध्यक्ष चौधरीका अनुसार यस आर्थिक वर्षमा मात्रै दर्जनभन्दा बढी सडकहरूको स्तरवृद्धि कार्य सम्पन्न भइसकेको छ। आवश्यकता अनुसार नयाँ ट्र्याक खोल्ने, नाली र कल्भर्ट निर्माण गर्ने, ग्राभेल गर्ने जस्ता पूर्वाधार विकासका काम पनि निरन्तर चलिरहेका छन्।
