विराटनगर । सुनसरीको लौकहीमा शुक्रबार आयोजित नेपाली कांग्रेस कोशी प्रदेशस्तरीय दुईदिने परामर्श कार्यशालामा उपसभापति विश्वप्रकाश शर्माले अब कोशी प्रदेश सरकारको नेतृत्व नेपाली कांग्रेसले गर्ने दाबी गरेका छन्।
उनले एमाले र कांग्रेसबीच यसअघि भएको सहमतिअनुसार प्रदेश सरकारको नेतृत्व परिवर्तन हुने तयारी भइरहेको संकेत गर्दै अब नेतृत्व कांग्रेसको हातमा जाने बताए। शर्माले भने, “अहिले यसबारे धेरै बोल्न चाहन्नँ, तर अब कोशी प्रदेशको नेतृत्व कांग्रेसले गर्नेछ भन्ने कुरा सबैले बुझ्नुपर्छ।”
हाल कोशी प्रदेश सरकारमा नेपाली कांग्रेस चार मन्त्रालयसहित सहभागी छ भने सरकारको नेतृत्व नेकपा एमालेले गरिरहेको छ। स्पष्ट बहुमत नभएका कारण दलहरूबीच आलोपालो नेतृत्व गर्ने सहमतिअनुसार सरकार सञ्चालन हुँदै आएको छ।
प्रदेश सरकारको नेतृत्व परिवर्तनबारे छलफल गर्न कांग्रेसले उपसभापति शर्मालाई जिम्मेवारी दिएको थियो। सोही क्रममा उनले प्रधानमन्त्री तथा एमाले अध्यक्ष केपी शर्मा ओलीसँग पटक–पटक छलफल गरेको जनाइएको छ। तर एमाले अध्यक्ष ओलीले कोशीमा आफ्नै दलको मुख्यमन्त्री कायम रहनुपर्ने अडान लिँदै आएका छन्।
यसैबीच, कोशी प्रदेशमा कांग्रेसभित्रै भावी मुख्यमन्त्री र संसदीय दलको नेतृत्वलाई लिएर आन्तरिक मतभेद देखिएको छ। संसदीय दलका नेता उद्धव थापालाई नै मुख्यमन्त्रीका रूपमा अघि सार्ने पक्षमा केही नेताहरू देखिए पनि अर्को समूहले अमृत अर्याललाई अघि बढाउनुपर्ने धारणा राखेको छ।
नेतृत्वको विषयलाई लिएर कांग्रेसभित्र गगन थापा र शेखर कोइराला पक्षबीच पनि फरक–फरक धारणा देखिएको बताइन्छ। केही सांसदहरू दलको नेतृत्व परिवर्तनको पक्षमा रहे पनि पर्याप्त संख्या नपुग्दा तत्काल निर्णय हुन सकेको छैन।
प्रदेश सरकारको हालैको राजनीतिक नियुक्ति र निर्णय प्रक्रियालाई लिएर पनि दलभित्र असन्तुष्टि देखिएको छ। केही सांसदहरूले निर्णय प्रक्रियामा स्पष्टता नभएको भन्दै नेतृत्वसँग प्रश्न उठाएका छन्।
कांग्रेस संसदीय दल २९ सदस्यीय रहेको छ। दलभित्रको शक्ति सन्तुलन र आन्तरिक छलफलपछि मात्र नेतृत्वबारे अन्तिम निर्णय हुने नेताहरूले बताएका छन्।
