काठमाडौं । केपी शर्मा ओली र पूर्वगृहमन्त्री रमेश लेखकलाई पाँच दिन हिरासतमा राखेर अनुसन्धान गर्न अदालतले अनुमति दिएको छ।
काठमाडौं जिल्ला अदालतका न्यायाधीश आनन्द श्रेष्ठले दुवै जनालाई हिरासतमा राखेर अनुसन्धान गर्न प्रहरीलाई अनुमति दिएका हुन्।
प्रहरीले चैत १४ गते उनीहरूलाई पक्राउ गरी आइतबार अदालतमा उपस्थित गराएको थियो। उनीहरूमाथि भदौ २३ र २४ गते भएको ‘जेनजी’ प्रदर्शनका क्रममा दमन गरी किशोरहरूमाथि घातक हतियार प्रयोग गर्न आदेश दिएको आरोप छ।
गौरीबहादुर कार्की नेतृत्वको जाँचबुझ आयोगले ओली र लेखकसहित तत्कालीन केन्द्रीय सुरक्षा समितिका पदाधिकारीहरूलाई फौजदारी मुद्दामा अनुसन्धान गर्न सिफारिस गरेको थियो। सोही आधारमा प्रहरीले उनीहरूमाथि ‘ज्यान सम्बन्धी कसुर’मा अनुसन्धान अघि बढाएको छ।
मन्त्रिपरिषद्को निर्णयअनुसार आयोगको प्रतिवेदन कार्यान्वयनका लागि प्रहरीमा पठाइएको थियो। जिल्ला प्रहरी परिसर काठमाडौंका एसएसपी रमेश थापाका अनुसार सोही प्रतिवेदनका आधारमा अनुसन्धान भइरहेको छ।
यद्यपि, केन्द्रीय सुरक्षा समितिका अन्य सुरक्षा निकायका अधिकारीहरूको हकमा छुट्टै समिति गठन गरी थप अध्ययन गर्ने निर्णय मन्त्रिपरिषद्ले गरेको छ।
जेनजी प्रदर्शनका क्रममा ७६ जनाको मृत्यु भएको उल्लेख गरिएको छ।
