काठमाडौं: प्रधानमन्त्री केपी शर्मा ओलीले काठमाडौं–तराई/मधेस द्रुतमार्ग आयोजनाको सुरुवात बिन्दुमा देखिएको विवाद र समाधानका उपायबारे ललितपुरको खोकना र बुङमतीका स्थानीय प्रतिनिधिहरूसँग आज छलफल गरेका छन्।
प्रधानमन्त्री निवास बालुवाटारमा आयोजित उक्त छलफलमा तत्कालीन खोकना गाविसका पूर्व अध्यक्ष मदनकृष्ण डङ्गोल, नेकपा (एमाले) ललितपुर महानगर कमिटी अध्यक्ष ज्ञानेन्द्र शाक्य, स्थानीय जनसरोकार समितिका संयोजक नेपाल डङ्गोल, एमाले वडा नं. २१ अध्यक्ष ज्ञानभक्त महर्जन लगायतले आयोजनासँग सम्बन्धित समस्या र समाधानका सम्भावित विकल्पहरू प्रस्तुत गरेका थिए।
स्थानीय सरोकार समितिले द्रुतमार्गको सुरुवात बिन्दु खोकनामा राख्दा परम्परागत सभ्यता, संस्कृति र जीवनशैलीमा गम्भीर क्षति पुग्ने भन्दै त्यसको सट्टा करीब ५.५ किलोमिटर तल डुकुछाप क्षेत्रबाट आयोजना सुरु गर्न सुझाव दिएको हो।
रक्षा मन्त्रालयका सचिव रामेश्वर दङ्गाल, प्रधानमन्त्री तथा मन्त्रिपरिषद्को कार्यालयका अधिकारीहरू र नेपाली सेनाका प्रतिनिधिहरू समेत सहभागी छलफलमा प्रधानमन्त्री ओलीले विकासका नाममा जनतामाथि अन्याय हुने गरी कुनै पनि काम नगर्ने सरकारको नीति स्पष्ट पारे। साथै, समस्या समाधानका लागि निर्णय गर्नु अघि आफूले स्थलमै पुगेर अवस्था अवलोकन गर्ने जानकारी पनि दिए।
यसअघि गत माघ २३ गते प्रधानमन्त्री ओलीले सिंहदरबारस्थित कार्यालयमा उपप्रधानमन्त्री एवं अर्थमन्त्री विष्णुप्रसाद पौडेल, भौतिक पूर्वाधारमन्त्री देवेन्द्र दाहाल, रक्षामन्त्री मानवीर राई, आर्थिक सल्लाहकार डा. युवराज खतिवडा, सेनाका प्रधानसेनापति अशोकराज सिग्देल तथा अन्य वरिष्ठ अधिकारीहरूसँग आयोजना सम्बन्धी प्रगति र चुनौतीहरूबारे छलफल गरेका थिए।
काठमाडौं–तराई/मधेस द्रुतमार्गको कुल लम्बाइ ७०.९७ किलोमिटर रहेको छ। कुल लागत दुई खर्ब ११ अर्ब ९३ करोड रुपैयाँ रहेको यो आयोजना सन् २०७४ सालमा सुरु भएको थियो। यस परियोजना सन् २०८३ को चैतसम्म सम्पन्न गर्ने लक्ष्य लिइएको छ।
