नेपाली कांग्रेसका नेता तथा पूर्वमन्त्री नवीन्द्रराज जोशीको उपचारका लागि सरकारले सहयोग गर्ने भएको छ । जोशीको उपचारका लागि सरकारले १० लाख रुपैयाँ दिने भएको हो ।
बिहीबार बसेको मन्त्रिपरिषद्को बैठकले नेता जोशीको उपचारमा १० लाख रुपैयाँ आर्थिक सहयोग गर्ने निर्णय गरेको हो ।
नेता जोशीको स्वास्थ्य अवस्थाबारे बुझ्नका लागि शुक्रबार बिहान उपप्रधानमन्त्री ईश्वर पोखरेल नर्भिक अस्पताल पुगेका थिए । सोहीक्रममा पोखरेलले आर्थिक सहयोगको निर्णय भएको जानकारी दिएका थिए ।
अस्पताल पुगेका उपप्रधानमन्त्री पोखरेलले जोशीका परिवारका सदस्यसँग भेटेका थिए । उनलाई जोशीको अवस्थाबारे चिकित्सकहरूले जानकारी गराएका छन् ।
गत फागुन १४ गते मस्तिष्कघात भएपछि जोशी नर्भिक अस्पतालमा भर्ना भएका थिए । जोशीको उपचारमा डा राजिव झाको नेतृत्वमा चिकित्सक टोलीले भेन्टिलेटरमा राखेर उपचार गरिरहेको छ ।
