सुर्खेत । प्रत्यक्षतर्फ पाँच सिट जित्दै कर्णाली प्रदेशमा पहिलो बनेको नेपाली कांग्रेसले समानुपातिकतर्फ पनि पहिलो स्थान कायम राखेको छ।
प्रदेश निर्वाचन कार्यालय कर्णालीले सार्वजनिक गरेको समानुपातिकतर्फको अन्तिम परिणामअनुसार नेपाली कांग्रेसले एक लाख ४१ हजार २३३ मत प्राप्त गरेको छ। कर्णालीभर प्रत्यक्षतर्फ एक सिट मात्रै जितेको राष्ट्रिय स्वतन्त्र पार्टीले समानुपातिकतर्फ एक लाख ३३ हजार ७४९ मत ल्याउँदै दोस्रो स्थान हासिल गरेको छ।
त्यसैगरी नेकपा (एमाले)ले एक लाख २० हजार ८६३ मत प्राप्त गरेको छ भने नेकपा (माओवादी केन्द्र)ले एक लाख सात हजार १०१ मत ल्याएको छ। राष्ट्रिय प्रजातन्त्र पार्टीले १५ हजार ७५५ मत प्राप्त गर्दा प्रगतिशील लोकतान्त्रिक पार्टीले आठ हजार ५३७ मत ल्याएको छ। नेपाल मजदुर किसान पार्टीले पाँच हजार १३० मत प्राप्त गरेको छ भने श्रम संस्कृति पार्टीले चार हजार ६७५ मत प्राप्त गरेको छ।
प्रदेश निर्वाचन कार्यालय कर्णालीका अनुसार प्रतिनिधिसभा निर्वाचनमा विभिन्न दल र स्वतन्त्रबाट उम्मेदवारी दिएका १३८ जनामध्ये ९० जनाको जमानत जफत भएको छ। कार्यालयका प्रमुख लालबहादुर गुरुङका अनुसार आवश्यक मत प्राप्त गर्न नसक्दा उनीहरूको जमानत जफत भएको हो।
जिल्लागत रूपमा हेर्दा सुर्खेत क्षेत्र नम्बर १ मा १३ उम्मेदवारमध्ये १० जनाको जमानत जफत भएको छ भने क्षेत्र नम्बर २ मा १७ उम्मेदवारमध्ये १४ जनाको जमानत जफत भएको छ। दैलेख क्षेत्र नम्बर १ मा ६ जना र क्षेत्र नम्बर २ मा ७ जनाको जमानत जफत भएको छ।
त्यसैगरी जाजरकोटमा ८, सल्यानमा १०, रुकुम पश्चिममा ९, कालीकोटमा ६, जुम्लामा ६, मुगुमा ४, डोल्पामा ६ र हुम्लामा ४ जना उम्मेदवारको जमानत जफत भएको निर्वाचन कार्यालयले जनाएको छ।
निर्वाचनमा ३६ जना उम्मेदवारले १०० मतसमेत प्राप्त गर्न सकेनन्। कर्णाली प्रदेशका १० जिल्लामा प्रत्यक्ष र समानुपातिक दुवै प्रणालीमा गरी बदर मतको संख्या ४३ हजार ५०० पुगेको छ।
