काठमाडौँ: जनता समाजवादी पार्टी (जसपा) नेपालले कवाड व्यवसायीहरूमाथि भइरहेको घटनाक्रमप्रति गम्भीर ध्यानाकर्षण जनाएको छ। बुधबार एक विज्ञप्ति जारी गर्दै, जसपाले काठमाडौँ महानगरपालिकाद्वारा कवाड व्यवसायीहरूमाथि गरिएको भौतिक संरचनाको तोडफोड र धरपकडलाई निन्दनीय करार गरेको छ। पार्टीले यस्ता कार्य तुरुन्त रोक्न र व्यवसायिक सुरक्षाको वातावरण बनाउन माग गरेको छ।
विज्ञप्तिमा भनिएको छ, “महानगरले कवाड व्यवसायीहरूमाथि गालीगलौज र अभद्र व्यवहार गर्दै व्यवसाय रोक्न खोज्नु अत्यन्त गलत र निन्दनीय कार्य हो। यसलाई यथाशीघ्र बन्द गरी व्यवसायीहरूको सुरक्षा सुनिश्चित गर्न र स्वतन्त्र रूपमा व्यवसाय सञ्चालन गर्न पाउने अधिकारको प्रत्याभूति गराउन सरकारसँग माग गर्दछ।”
जसपाले कवाड व्यवसायले देशभरका उद्योगलाई कच्चापदार्थ उपलब्ध गराउनुका साथै वातावरणीय सफाइमा पनि महत्वपूर्ण योगदान दिइरहेको बताएको छ। विज्ञप्तिमा यो व्यवसायमा निम्न आय भएका व्यक्तिहरू विशेषगरी मधेशी समुदायका नागरिकहरूको संलग्नता रहेको र वर्षौंदेखि कानुनी रूपमा सञ्चालन हुँदै आएको उल्लेख छ। यसले काठमाडौँ उपत्यकामा लाखौँलाई रोजगार प्रदान गरिरहेको पनि भनिएको छ।
