काठमाडौं । नेकपा (एमाले) को केन्द्रीय सचिवालय बैठकमा सहभागी नेताहरूले आ–आफ्ना धारणा राख्ने क्रम जारी रहेको छ। शनिबार बसेको सचिवालय बैठकपछि सञ्चारकर्मीहरूलाई जानकारी दिँदै उपमहासचिव लेखराज भट्टले बैठकको प्रक्रिया र पछिल्ला चर्चाबारे स्पष्ट पारेका छन्।
उपमहासचिव भट्टका अनुसार बैठकमा अधिकांश सचिवहरूले आफ्ना अनुभव, अनुभूति र समसामयिक राजनीतिक विषयमा धारणा राखेका छन्। उनले बाँकी रहेका चार जना सचिवहरूले आइतबार आफ्नो धारणा राखेपछि प्रस्तावित ११ वटा एजेन्डामा औपचारिक छलफल सुरु हुने जानकारी दिए।
उनले भने, “पाँच जना सचिवहरूले आफ्ना लागेका विषयवस्तु राख्नुभयो। सबैले आफ्ना अनुभव र अनुभूति प्रस्तुत गर्नुभयो। भोलि बाँकी चार जना सचिवहरूले धारणा राख्नुहुन्छ। त्यसपछि हामी ११ वटा प्रस्तावित एजेन्डामा छलफलमा जान्छौँ। बीचबीचमा अध्यक्षले आवश्यक निर्देशन पनि दिनुभएको छ।”
बैठकमा उठेका विषयहरूलाई लिएर बाहिर आएका समाचारप्रति उपमहासचिव भट्टले असन्तुष्टि जनाएका छन्। उनका अनुसार बैठकभित्रका विषयहरूलाई अतिरञ्जित गरी बाहिर प्रस्तुत गरिएको छ।
पार्टीभित्र विभिन्न विचार र दृष्टिकोण हुनु स्वाभाविक भए पनि त्यसलाई पार्टीको नीति, विधि र अनुशासनभित्रै राखेर व्यवस्थापन गर्नुपर्नेमा उनले जोड दिएका छन्।
उनले थपे, “म जुन स्कुलिङबाट आएको हुँ, त्यसअनुसार पार्टीको मुख्य लाइनभन्दा बाहिर गएर कुरा गर्नु हुँदैन। पार्टीको अनुशासन, विधि र पद्धतिभित्र बसेर आफ्ना धारणा कमिटीमै राख्नुपर्छ।”
भट्टका अनुसार आइतबारको बैठक सम्पन्न भएपछि मात्रै सचिवालय बैठकले गरेका निर्णयहरू आधिकारिक रूपमा सार्वजनिक गरिनेछ।
