दोधारा चाँदनी (कञ्चनपुर): एशियाली विकास बैंक (एडिबी) को सहयोगमा भीमदत्त नगरपालिकाले महेन्द्रनगर बजार क्षेत्रको आधुनिकीकरण गर्दै १४ किलोमिटर कालोपत्रे सडक निर्माण सम्पन्न गरेको छ। सडकसँगै अपाङ्गमैत्री पैदलमार्ग, साइकल लेन, पार्क, र हरियालीसहितको पूर्वाधार विकास गरिएको हो।
नगरपालिकाका सब–इन्जिनियर पवन लेखकका अनुसार गुरुयोजनाअनुसार गरिएको विकासको पहिलो चरणमा एक अर्ब रुपैयाँको लगानीमा पाँच गल्लीलाई आठ मिटर चौडा बनाइएका छन्। साथै, २२ किलोमिटर ढल निकास, चार किलोमिटर रेलिङ, ७७६ बत्ती र आठवटा हाइमास्ट लाइट जडान गरिएका छन्। बिजुलीका पोल तथा तारहरू व्यवस्थापन गरिएका छन् र पार्किङ सुविधा पनि थपिएको छ।
दोस्रो चरण अन्तर्गत आठ किलोमिटर सडक र दश किलोमिटर ढल निकास निर्माणका लागि रु ६६ करोड बजेट स्वीकृत भइसकेको छ भने निर्माण प्रक्रिया अगाडि बढाइएको छ।
स्थानीय व्यवसायी जगदीशचन्द्र भट्टले महेन्द्रनगरलाई अझ व्यवस्थित गरेमा पर्यटन र लगानी प्रवर्द्धनमा मद्दत पुग्ने बताउनुभयो। “हालै बनेका अपाङ्गमैत्री पैदलमार्ग र साइकल लेनले बजारको आकर्षण थपेका छन्,” उहाँले भन्नुभयो।
महेन्द्रनगर बजारको निर्माण विसं २०१८ मा तत्कालीन राजा महेन्द्रको आदेशमा ब्रह्मदेवबाट सारेर गरिएको हो। बजारका पाँच गल्लीले फरक पहिचान बोकेका छन्—प्रत्येक गल्लीमा विशेष प्रकारका व्यवसायहरू छन्, जस्तै मेडिकल, बैंक, हार्डवेयर, पुस्तक पसल, होटल र फेन्सी पसलहरू। गल्ली नं. ५ (क्याम्पस रोड) सर्वाधिक व्यस्त क्षेत्र मानिन्छ।
स्थानीय इन्द्र साउदले परम्परागत स्वरूप नबिगारी गुरुयोजनाअनुसार बजार व्यवस्थापन गर्न जोड दिनुभयो। उहाँले अतिक्रमण रोक्न र सौन्दर्य बिगार्ने संरचनामाथि कडाइ गर्नुपर्ने धारणा राख्नुभयो।
एडिबीको सहयोगमा भइरहेको पूर्वाधार विकासले महेन्द्रनगर बजारलाई व्यवस्थित, सुरक्षित र लगानीमैत्री बनाएको व्यापारीहरूको प्रतिक्रिया छ।
