काठमाडौं: ऊर्जा, जलस्रोत तथा सिँचाइमन्त्री दीपक खड्काले अब देशमा घरघरमा लोडसेडिङ हुने अवस्था आएको बताएका छन्। उनले साँझको समयमा लोडसेडिङ हुने सम्भावना व्यक्त गरे।
भारतबाट लगभग ८०० मेगावाट विद्युत् आयात भइरहेको र स्वदेशी उत्पादन एक हजार मेगावाटको आसपास रहेको भन्दै उनले लोडसेडिङको समस्या यसअघिको जस्तो ठूलो नदेखिएको बताए।
बुधबार राष्ट्रियसभामा सांसदहरूको प्रश्नको जवाफ दिँदै मन्त्री खड्काले नेपाल विद्युत् प्राधिकरणले आफ्ना कार्यहरू प्रभावकारी रूपमा नगरेको आरोप लगाए। लोडसेडिङ अन्त्य भएको भनिएता पनि, उनले उद्योगहरूमा हालसम्म लोडसेडिङ कायम रहेको बताए।
प्राधिकरणका कार्यकारी निर्देशक कुलमान घिसिङलाई ‘उज्यालोको नायक’का रूपमा प्रस्तुत गरिएकोमा मन्त्री खड्काले असन्तुष्टि जनाए। उनले भने, “उज्यालोको नायक उहाँ (कुलमान घिसिङ) होइन। बरु हामीलाई भारत सरकारलाई धन्यवाद दिनु पर्छ र निजी क्षेत्रलाई धन्यवाद दिनु पर्छ, जसले उत्पादन गरेर आपूर्ति गरेको छ।”
मन्त्री खड्काले प्राधिकरणले नाफा कमाएको भनिए पनि, महालेखा परीक्षकको कार्यालयको प्रतिवेदनमा प्राधिकरणले २ खर्ब रुपैयाँभन्दा बढी घाटा भोगिरहेको जानकारी दिए।
