काठमाडौं: इन्डोनेसियाको भ्रमणमा रहेका पोप फ्रान्सिस र इन्डोनेसियाका शाही इमामले विश्वलाई शान्तिको साझा सन्देश दिएका छन् । पोप फ्रान्सिसले “द्वन्द्व भड्काउन धर्मको प्रयोग” विरुद्ध पनि चेतावनी दिए।
पोपले राजधानी जकार्ताको इस्तिकलाल मस्जिदमा शाही इमामसँग धार्मिक सद्भाव र वातावरण संरक्षणसम्बन्धी घोषणापत्रमा हस्ताक्षर गरे। यहाँ उनले अन्य ६ धर्मका नेताहरुसँग पनि भेट गरे ।
बिहीबार दक्षिण एसियाको सबैभन्दा ठूलो मस्जिदको भ्रमणका क्रममा मानिसहरूलाई सम्बोधन गर्दै पोपले भने, “सबै धर्मका मानिसहरूलाई थाहा हुनुपर्छ कि हामी सबै दाजुभाइ हौं, सबैको एउटै बाटो छ, ईश्वरसम्म पुग्ने।”
उनले युद्ध, द्वन्द्व र वातावरणीय विनाशका कारण आज मानवता ‘महा संकट’मा रहेको बताए ।
पोपले इस्तिकलाल मस्जिदलाई सडकको क्याथोलिक चर्चसँग जोड्ने ९१ फिट लामो सुरुङको पनि भ्रमण गरे।
दुवै धर्मगुरुले यो ‘टनेल अफ फ्रेन्डशिप’को निरीक्षण गरेका थिए ।
यसलाई धार्मिक भाइचाराको प्रतीक भनिन्छ र विभिन्न धार्मिक विश्वासका मानिसहरू कसरी साझा विरासतबाट आउँछन् भनेर देखाउँछ।
इन्डोनेसिया विश्वको सबैभन्दा ठूलो मुस्लिम बहुल देश हो र २७.५ करोड जनसंख्या मध्ये तीन प्रतिशत क्याथोलिक धर्मका अनुयायी छन्।
इन्डोनेसियामा छवटा आधिकारिक रूपमा मान्यता प्राप्त धर्महरू छन्: इस्लाम, प्रोटेस्टेन्टवाद, क्याथोलिक, बौद्ध, हिन्दू र कन्फ्युसियनवाद।
८७ वर्षीय पोप एशिया प्रशान्त क्षेत्रको ११ दिने भ्रमणमा छन् र बिहीबार इन्डोनेसियामा उनको अन्तिम दिन थियो । यो उनको कार्यकालको सबैभन्दा लामो विदेश भ्रमण हो ।
यहाँबाट पोप फ्रान्सिस पपुवा न्युगिनी, टिमोर लेस्टे र सिंगापुर जानेछन् ।
