काठमाडौँ: देशभर विभिन्न कार्यक्रमका साथ आज ७५औँ ‘राष्ट्रिय प्रजातन्त्र दिवस’ मनाइँदै छ। मूल समारोह समितिद्वारा सैनिक मञ्च टुँडिखेलमा आयोजित विशेष समारोहमा राष्ट्रपति रामचन्द्र पौडेल सहभागी हुने कार्यक्रम रहेको छ।
समारोहमा मुलुकमा प्रजातन्त्र स्थापनाका लागि भएका संघर्षमा बलिदान दिने ज्ञात-अज्ञात सहिदहरूप्रति श्रद्धाञ्जली अर्पण गरिनेछ। कार्यक्रममा प्रधानमन्त्री केपी शर्मा ओलीले सम्बोधन गर्ने कार्यक्रम छ।
प्रजातन्त्र दिवसको अवसरमा सरकारले आज सार्वजनिक बिदा दिएको छ। नेपालमा जहानियाँ राणा शासनको अन्त्य भई प्रजातन्त्रको स्थापनासँग जोडिएको गौरवमय दिनका रूपमा २००७ फागुन ७ गतेलाई स्मरण गरिन्छ।
यस अवसरमा राष्ट्रपति पौडेलले शुभकामना सन्देश जारी गर्दै मुलुकको सार्वभौमसत्ता जनतामा निहित हुनुपर्छ भन्ने मान्यतालाई संघर्ष र सहिदहरूको बलिदानबाट स्थापित गरिएको उल्लेख गर्नुभएको छ।
