काठमाडौं: प्रजातन्त्र स्थापना, पुनःस्थापना तथा स्वतन्त्रताका लागि जीवन आहुति दिने सहिदहरूको सम्मानमा देशभर विविध कार्यक्रम गरी आज सहिद दिवस मनाइँदैछ। विसं २००७ देखि हरेक वर्ष माघ १६ गते यो दिवस मनाइँदै आएको हो।
माघ १० देखि १६ गतेसम्म सहिद सप्ताह घोषणा गरी विभिन्न कार्यक्रमहरू गरिँदै आएको छ। तत्कालीन काठमाडौं नगरपालिकाको संयोजनमा विसं २०१२ देखि माघ १६ लाई सहिद दिवसका रूपमा मनाउन थालिएको हो।
विसं १९९७ मा शुक्रराज शास्त्रीलाई टेकुको पचलीमा माघ १० गते, धर्मभक्त माथेमालाई सिफलमा माघ १३ गते, र गङ्गालाल श्रेष्ठ तथा दशरथ चन्दलाई माघ १५ गते शोभा भगवतीमा राणा शासकद्वारा मृत्युदण्ड दिइएको थियो।
आजको दिवसका अवसरमा बिहान शान्तिवाटिकादेखि सहिद स्मारक लैनचौरसम्म प्रभातफेरि आयोजना गरिएको छ। प्रधानमन्त्री, मन्त्री, सुरक्षा निकायका अधिकारीहरू तथा जनप्रतिनिधिहरूको सहभागितामा प्रभातफेरि गरी ज्ञात–अज्ञात सहिदलाई श्रद्धाञ्जली अर्पण गरिनेछ।
गोकर्णेश्वरमा निर्माण भइरहेको राष्ट्रिय सहिद स्मारकमा वन तथा वातावरण मन्त्री ऐनबहादुर शाहीको प्रमुख आतिथ्यतामा कार्यक्रमको तयारी गरिएको छ। उक्त कार्यक्रम सहिद तथा शान्ति पार्क यज्ञडोल व्यवस्थापन समितिको आयोजनामा हुनेछ।
सहिद गेट र लैनचौर सहिद स्मारकमा विशेष कार्यक्रम हुँदै आएको भए पनि पछिल्लो समय नारायणहिटी दरबार संग्रहालय परिसरमा गणतन्त्र स्मारक निर्माण गरी सहिदप्रति श्रद्धाञ्जली दिने स्थल बनाइएको छ।
