काठमाडौँ: देशभर हाल पश्चिमी न्यून चापीय प्रणालीको आंशिक प्रभाव रहेको मौसम पूर्वानुमान महाशाखाले जनाएको छ। यस प्रभावका कारण पहाडी भूभागमा आंशिक बदली देखिएको छ भने बाँकी क्षेत्रमा मौसम मुख्यतया सफा रहेको छ।
आज दिउँसो कोशी, बागमती र गण्डकी प्रदेशका पहाडी क्षेत्रमा आंशिकदेखि सामान्य बदली रहनेछ, भने अन्य भूभागमा आंशिक बदली वा सफा मौसम रहनेछ। यी तीन प्रदेशका उच्च पहाडी तथा हिमाली क्षेत्रका एक–दुई स्थानमा हल्का हिमपातको सम्भावना छ। साथै, कोशी र बागमती प्रदेशका पहाडी क्षेत्रमा केही स्थानमा चट्याङ्गसहित हल्का वर्षा हुन सक्ने सम्भावना रहेको छ।
राति देशका पहाडी क्षेत्रमा आंशिकदेखि सामान्य बदली रहनेछ, भने अन्य स्थानमा मौसम सामान्यतः सफा रहनेछ। कोशी, गण्डकी र कर्णाली प्रदेशका उच्च पहाडी तथा हिमाली भूभागमा हल्का हिमपातको सम्भावना रहेको छ।
मौसम पूर्वानुमान महाशाखाले उच्च पहाडी तथा हिमाली क्षेत्रमा हल्का हिमपात र कोशी तथा बागमती प्रदेशका पहाडी क्षेत्रमा चट्याङ्गसहित हल्का वर्षाको सम्भावना भएकाले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने चेतावनी दिएको छ। यसबाट बच्न आवश्यक सतर्कता अपनाउन महाशाखाले अनुरोध गरेको छ।
