काठमाडौँ: देशमा पश्चिमी वायु, स्थानीय वायु र बङ्गालको खाडीबाट भित्रिएको जलवाष्पयुक्त हावाको प्रभावका कारण हाल देशका केही पहाडी भागसहित काठमाडौँ उपत्यकामा हल्का वर्षा भएको छ।
मौसम पूर्वानुमान महाशाखाले आज बिहान सार्वजनिक गरेको बुलेटिनअनुसार दिउँसो देशभर आंशिकदेखि सामान्य बदली रहनेछ। कोशी, लुम्बिनी प्रदेशसहित देशका पहाडी भू–भागका केही स्थान र बाँकी भू–भागका एक–दुई स्थानमा मेघगर्जन, चट्याङ र हुरीबताससहित हल्कादेखि मध्यम वर्षा हुने सम्भावना रहेको छ।
महाशाखाका अनुसार देशका हिमाली तथा उच्च पहाडी भू–भागका केही स्थानमा हल्का वर्षा र हिमपात पनि हुन सक्छ।
आज राति पनि देशको पहाडी क्षेत्रमा आंशिकदेखि सामान्य बदली रहनेछ भने बाँकी भू–भागमा आंशिक बदलीको अवस्था रहनेछ। रातिको समयमा पनि पहाडी क्षेत्रका केही स्थान तथा अन्यत्र एक–दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ।
