काठमाडौँ: हाल देशमा पश्चिमी वायु, स्थानीय वायु तथा अरब सागरबाट भित्रिएको जलवाष्पयुक्त हावाको आंशिक प्रभाव रहेको मौसम पूर्वानुमान महाशाखाले जनाएको छ।
आज दिउँसो कोशी, लुम्बिनी र सुदूरपश्चिम प्रदेशका साथै देशका पहाडी भू–भागमा आंशिकदेखि सामान्य बदली रहनेछ, भने बाँकी भू–भागमा आंशिक बदलीको सम्भावना रहेको छ। ती प्रदेशका पहाडी क्षेत्रमा थोरै स्थानहरूमा तथा अन्य पहाडी भू–भागका एक–दुई स्थानमा मेघगर्जन/चट्याङ्गसहित हल्कादेखि मध्यम वर्षा हुन सक्ने सम्भावना रहेको छ।
देशका हिमाली भू–भागका एक–दुई स्थानमा हल्का वर्षा वा हिमपातको सम्भावना रहेको महाशाखाले जनाएको छ। साथै, मधेस प्रदेशसहित लुम्बिनी प्रदेशका केही स्थानमा हावाहुरी चल्न सक्ने सम्भावना समेत रहेको छ।
आज राति पनि देशका पहाडी भू–भागमा आंशिक बदली रहनेछ भने बाँकी क्षेत्रमा मौसम मुख्यतः सफा रहने अनुमान गरिएको छ। पहाडी भू–भागका एक–दुई स्थानमा मेघगर्जन/चट्याङ्गसहित हल्कादेखि मध्यम वर्षा र हिमाली क्षेत्रका एक–दुई स्थानमा हल्का वर्षा वा हिमपातको सम्भावना यथावत् रहेको महाशाखाले जनाएको छ।
