काठमाडौँ: हाल देशका पश्चिम र मध्य क्षेत्रहरूमा पश्चिमी तथा स्थानीय वायुको प्रभाव कायम रहेको छ भने कोशी प्रदेशका अधिकांश भागमा मनसुनी प्रणालीको असर देखिएको जल तथा मौसम पूर्वानुमान महाशाखाले जनाएको छ।
महाशाखाका अनुसार, आज दिउँसो कोशी र लुम्बिनी प्रदेशसहित देशका पहाडी भेगमा आंशिकदेखि सामान्य बदली रहनेछ। बाँकी भू-भागमा मौसम सामान्यतः सफा रहने अपेक्षा गरिएको छ। ती क्षेत्रमा केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। साथै, उच्च पहाडी तथा हिमाली भेगका एक-दुई स्थानमा हल्का वर्षा र हिमपात पनि हुन सक्नेछ।
आज राति पनि कोशी, लुम्बिनी र गण्डकी प्रदेशसहित पहाडी क्षेत्रमा आंशिकदेखि सामान्य बदली रहने अनुमान गरिएको छ, जबकि अन्य भागमा मौसम सफादेखि आंशिक बदली रहनेछ। कर्णाली प्रदेशका उच्च पहाडी र हिमाली क्षेत्रका केही स्थानमा पनि हल्का वर्षा तथा हिमपातको सम्भावना रहेको महाशाखाले जनाएको छ।
