काठमाडौँ: देशभर हाल पश्चिमी तथा स्थानीय वायुको प्रभाव रहेको छ, भने बङ्गालको खाडी र अरब सागरबाट आएको जलवाष्पयुक्त हावाको पनि आंशिक असर देखिएको मौसम पूर्वानुमान महाशाखाले जनाएको छ।
महाशाखाका अनुसार आज दिउँसो देशभर आंशिकदेखि सामान्य बदली रहनेछ। कोशी, मधेस, बागमती र गण्डकी प्रदेशका साथै बाँकी प्रदेशका पहाडी भेगका केही स्थानमा तथा अन्य भूभागका एक-दुई स्थानमा मेघगर्जन, चट्याङसहित हल्कादेखि मध्यम वर्षाको सम्भावना रहेको छ। उच्च पहाडी तथा हिमाली क्षेत्रमा भने एक-दुई स्थानमा हल्का वर्षा र हिमपात हुन सक्ने सम्भावना छ। मधेस र कोशी प्रदेशका तराई भू–भागका केही स्थानमा हुरीबतास चल्ने सम्भावना पनि रहेको महाशाखाले जनाएको छ।
आज राति पनि कोशी, बागमती, गण्डकी, लुम्बिनी र सुदूरपश्चिम प्रदेशका पहाडी भेगमा आंशिकदेखि सामान्य बदली रहनेछ, भने बाँकी भू–भागमा मौसम सफा वा आंशिक बदली रहनेछ। कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानहरूमा तथा मधेस प्रदेशलगायत अन्य पहाडी भेगका एक-दुई स्थानमा पनि मेघगर्जन र चट्याङसहित हल्कादेखि मध्यम वर्षा हुने सम्भावना छ। साथै, कोशी, बागमती र गण्डकी प्रदेशका उच्च पहाडी तथा हिमाली क्षेत्रका केही स्थानमा हल्का वर्षा र हिमपात हुन सक्ने उल्लेख गरिएको छ।
