वालिङ (स्याङ्जा): भीरकोट नगरपालिका-४ छाङछाङ्दी र ५ छत्तिवनलाई जोड्ने आँधीखोलामा निर्माणाधीन पुल सात वर्ष पुग्न लाग्दा पनि निर्माण सम्पन्न हुन सकेको छैन। २०७५ असार २६ मा सम्झौता भई २०७८ वैशाख ३० सम्ममा सम्पन्न गर्नुपर्ने उक्त पुलको निर्माण तेस्रोपटक थपिएको समयावधि (२०८१ मंसिर) सकिएपछि पनि अझै पूरा भएको छैन।
सडक डिभिजन कार्यालय पोखराका इञ्जिनियर दीपक विष्टका अनुसार सम्झौता रकम रु १४ करोड २६ लाख ३७ हजार चार सय २० लागतमा तीन स्पानको १२५ मिटर लामो पुल निर्माण गरिने योजना थियो। हालसम्म किनाराका दुई स्पानको निर्माण सकिएको भए पनि बीचको स्पान र दुवैतर्फको पहुँचमार्ग निर्माण बाँकी छ।
निर्माण व्यवसायी चन्द्र थकालीले झण्डै ८० प्रतिशत काम सम्पन्न भएको दाबी गर्दै, अब दुई महिनाभित्र निर्माण पूरा गर्ने लक्ष्य राखिएको बताए। “दुवैतर्फका स्पान बनिसकेका छन्, बीचको स्पान निर्माणका लागि कामदार परिचालन गरिसकेका छौँ,” उहाँले भन्नुभयो।
पुलसँगै खोलाको दायाँबायाँ पर्खाल निर्माण नहुँदा वर्षामा आँधीखोलाले किनाराका खेतीयोग्य जमिन कटान गरी बगरमा परिणत गरेको छ। हिउँदमा स्थानीयले बाँसको फड्के वा खोला तारेर यात्रा गर्नुपर्ने बाध्यता छ भने बर्खायाममा झोलुङ्गे पुलको घुमाउरो बाटो प्रयोग गर्नुपर्छ।
पुल निर्माण व्यवसायीले दुई महिनाभित्र निर्माण सम्पन्न गर्ने योजना प्रस्तुत गरेका छन्। तर पटकपटक समय थप्दा पनि काम पूरा हुन नसक्दा स्थानीयवासी समस्यामा छन्।
