काठमाडौं: कार्यवाहक प्रधानमन्त्री प्रकाशमान सिंहले सर्वदलीय बैठक आह्वान गरेका छन्। आज दिउँसो एक बजे प्रधानमन्त्री कार्यालय सिंहदरबारमा बस्ने गरी सर्वदलीय बैठक डाकिएको कार्यवाहक प्रधानमन्त्री सिंहको निजी सचिवालयले जानकारी दिएको छ।

अविरल वर्षापछिको बाढीपहिरो एवं विपद्, उद्धार, धनजनको क्षति र राहतका विषयमा छलफल गर्न सर्वदलीय बैठक आह्वान गरिएको हो।

मनसुन सक्रिय भएसँगै बाढी, पहिरो र डुबानले गर्दा देशभरको जनजीवन प्रभावित भएको छ। केही जिल्लामा मानवीय क्षति भएको छ। सडक, पुलपुलेसा पनि भत्किएका छन्। प्राकृतिक विपद्को यो विषम परिस्थितिमा नागरिकको सेवामा सरकार तल्लिन छ।

यात्राका क्रममा अलपत्र परेकाहरुलाई उद्धार गरी गन्तव्यमा पुर्‍याउने प्रयास भइरहेको छ। त्यसका लागि गृहमन्त्रालयको समन्वयमा आवश्यक प्रयास जारी रहेको कार्यवाहक प्रधानमन्त्री सिंहको सचिवालयले जनाएको छ।

कार्यवाहक प्रधानमन्त्री सिंहले शनिबार गृहमन्त्री रमेश लेखक, सुरक्षा अंगका प्रमुखहरु, मुख्यसचिव, सचिवलगायतबाट देशभरको विपद्को अवस्थाबारे जानकारी लिएका छन्।

राष्ट्रिय आपतकालिन कार्य सञ्चालन केन्द्र, विपद् जोखिम न्यूनीकरण तथा व्यवस्थापन प्राधिकरणलगायत सबैको समन्वयमार्फत विपदबाट प्रभावित व्यक्ति एवं परिवारको सेवामा सरकारका सबै अङ्ग पूर्ण रुपमा परिचालन गरिएको उनको सचिवालयले जनाएको छ।

अहोरात्र सुरक्षाकर्मीहरु उद्धार, खोज, राहत र पुनःस्थापनामा परिचालित भइरहेका, कर्मचारी, सामाजिक सेवाका क्षेत्रमा क्रियाशील संघसंस्था, राजनीतिक दल, नागरिक समाज र स्थानीयबासी आफैं पनि लागिरहेका उल्लेख गर्दै कार्यवाहक प्रधानमन्त्री सिंहले यो विषम परिस्थितिमा विपदमा परी ज्यान गुमाउनेहरुप्रति नेपाल सरकारकोतर्फबाट हार्दिक श्रद्धाञ्जली व्यक्त गर्दै सबैलाई संयमित र एकताबद्ध भई पीडितको सेवामा परिचालित हुन आह्वान गरेका छन्।

मौसमविद्हरुका अनुसार वर्षा अझै पनि जारी रहने भन्ने जानकारी प्राप्त भएकाले थप क्षति हुनबाट जोगिन अत्यावश्यक काम बाहेक हिँडडुल नगर्न उनले सबैमा अनुरोध गरेका छन्।

खोटाङ: अविरल वर्षासँगै आएको बाढी तथा पहिराले खोटाङमा २७ घर बगाएको छ । तीन दिनदेखि लगातार परेको भीषण वर्षाका कारण जिल्लाका विभिन्न ठाउँमा बाढी तथा पहिरोले २७ वटा घर पूर्णरुपमा बगाएको जिल्ला विपद् व्यवस्थापन समितिका संयोजक एवम् प्रमुख जिल्ला अधिकारी शिवकुमार कार्कीले जानकारी दिनुभयो ।

उहाँले बाढीपहिरोका कारण हालसम्म मानवीय क्षति नभए पनि दुईजना घाइते भएका, आठवटा पशुचौपाया पुरिएका बताउनुभयो । “बाढीपहिराले हालसम्म मानवीय क्षति नभए पनि जिल्लामा ठूलो क्षति गरेको छ । अझै पनि वर्षा भइरहेकाले सतर्कता अपनाउन र बाढीपहिरोबाट विस्थापितको उद्धारमा जिल्लास्थित तीनवटै सुरक्षा निकायका टोली परिचालन गरिएका छन्”, प्रजिअ कार्कीले भन्नुभयो ।

पहिरोले घरबारविहीन भएका स्थानीयलाई नजिकको विद्यालय तथा आफन्तकामा सारिएको जनाइएको छ । पहिरोले घर बगाएपछि करोडौँको क्षति व्यहोरेका स्थानीय बासिन्दालाई राहत उपलब्ध गराउन सम्बन्धित स्थानीय तहसँग समन्वय गर्ने काम भइरहेको जिल्ला विपद् व्यवस्थापन समितिले जनाएको छ ।

भीषण बाढीका कारण खोटाङ र उदयपुरको सिमानामा पर्ने सुनकोशीस्थित फोक्सिङटार पुल बगाएको छ । पुल बगाएपछि पूर्वी तराईसँगको यातायात सम्पर्क विच्छेद भएको छ । खोटाङको खोटेहाङ गाउँपालिका–९ लिच्कीराम्चे र उदयपुरको रौतामाई गाउँपालिका–५ आँपटार जोड्ने आर्क डिजाइनको मोटरेबल पुलसमेत बगाएपछि यातायात अवरुद्ध भएको हो ।

अविरल वर्षाका कारण जिल्लाका सबै सडक अवरुद्ध भएको जनाइएको छ । मध्यपहाडी लोकमार्गअन्तर्गत दिक्तेल–हलेसी तथा दिक्तेल–चखेवाभञ्ज्याङ सडकका विभिन्न ठाउँमा पहिरो खस्दा सडक पूर्ण रूपमा अवरुद्ध भएपछि यात्रुहरू समस्यामा परेका खोटाङ यातायात प्रालिका महासचिव रामकुमार हिङमाङले जानकारी दिनुभयो ।

भीषण बाढीले दूधकोशी तथा सुनकोशी आसपासका स्थानीय बासिन्दा जोखिममा परेका छन् । सुनकोशीमा ४० वर्षयताकै ठूलो बाढी आएको हलेसी तुवाचु नगरपालिका–१ बाहुनीडाँडाका वडाध्यक्ष फौदराज राईले जानकारी दिनुभएको छ ।

काठमाडौँ: नेपालका लागि फ्रान्सका राजदूत भर्जिनी कोर्टेभालले नेपालमा बाढीपहिरोका कारण भएको धनजनको क्षतिप्रति दुःख व्यक्त गर्दै नेपाल सरकार र नेपाली जनताप्रति सहानुभूति प्रकट गर्नुभएको छ ।

नेपाल–फ्रान्स शैक्षिक साझेदारीका सन्दर्भमा शनिबार साँझ आफ्नै निवासमा आयोजित स्वागत समारोहमा उहाँले प्राकृतिक विपत्तिमा परी अमूल्य जीवन तथा भौतिक क्षति भएको खबरले आफू मर्माहत भएको बताउँदै यो विषम परिस्थितिमा फ्रान्स सरकार र फ्रान्सेली जनता नेपाल सरकार र नेपाली जनताप्रति हार्दिक सहनुभूति एवं ऐक्यबद्धता प्रकट गर्दछौँ भन्नुभयो ।

फ्रान्सका विभिन्न शैक्षिक प्रतिष्ठानमा माध्यमिक शिक्षादेखि विद्यावारिधिसम्मको अध्ययन गर्न चाहने नेपालीलाई लक्ष्यित गरी आयोजित शैक्षिक प्रदर्शनीले फ्रान्स र नेपालबीचको सम्बन्धलाई शिक्षाका माध्यमबाट अझ उन्नत बनाउने विश्वास व्यक्त गर्नुभयो । जेहेन्दार विद्यार्थीलार्ई आफ्नो देशले छात्रवृत्तिको व्यवस्था पनि गरेकाले त्यसबाट नेपाल लाभान्वित हुने विश्वास राजदूत कोर्टेभालले व्यक्त गर्नुभयो र

त्यस अवसरमा त्रिभुवन र काठमाडौँ विश्वविद्यालयका प्राध्यापक एवं प्रशासकका साथै ‘क्याम्पस फ्रान्स’ का दक्षिण एसियाली मुलुकका प्रतिनिधिहरूको उपस्थिति थियो ।

काठमाडौँ: नेपाल कम्युनिष्ट पार्टी (माओवादी केन्द्र) ले बाढी, पहिरो र डुबानमा परेका जनताको उद्धारमा जुट्न पार्टी पंक्ति, मोर्चा र आमनागरिकलाई अपिल गरेको छ ।

आज एक विज्ञप्ति जारी गर्दै विपदको समयमा उच्च मानवीयता प्रदर्शन गर्दै समस्यामा परेका नागरिकहरूको सहयोगका लागि सक्रियतापूर्वक जुट्न पार्टीले अपिल गरेको हो ।

“दुई दिनयता परेको भारी वर्षाका कारण देशभर बाढी, पहिरो र डुबानले जनजीवन अस्तव्यस्त बनेको छ, मनसुनजन्य विपत्तिका कारण आज धेरै मानवीय क्षति भएको छ । धेरै घाइते र सम्पर्क बाहिर रहेका प्रारम्भिक तथ्याङ्क सार्वजनिक भएको छ । एकपछि अर्को गर्दै देशभरबाट दुःखद खबर आउने क्रम जारी छ । त्यसैले यो विपत्को समयमा उच्च सतर्कतासहित उद्धारमा खट्न अपिल गर्दछौँ”, विज्ञप्तिमा भनिएको छ,“जल तथा मौसम विज्ञान विभागलगायतका सम्बद्ध निकायहरूले एक हप्ता अघिदेखि नै यस किसिमको बर्सात र सम्भावित क्षतिको पूर्वानुमान गरेको भए पनि पूर्वतयारीमा आवश्यक ध्यान दिन नसक्दा ठूलो जनधनको क्षति भएको छ । विपत्तिपूर्ण घडीमा पीडित नागरिकको उद्धार, राहत र पुनःस्थापनाका लागि सरकारले तत्काल आवश्यक कदम चाल्नु आवश्यक छ ।”

यस्तै, दसैँ, तिहार, छठलगायत चाडपर्वलाई ध्यानमा राखेर बन्द रहेका सडकमार्ग यथासक्य छिटो खुलाउन सरकारको ध्यान केन्द्रित गर्न आग्रह गरिएको छ ।

लेखनाथ (कास्की) : गण्डकी प्रदेशका मुख्यमन्त्री सुरेन्द्रराज पाण्डेले पदयात्राका लागि नेपालको हिमाली क्षेत्र उत्कृष्ट भएको बताउनुभएको छ । पदयात्रा गर्न विदेशी पर्यटकलाई आकर्षित गर्न आवश्यक भएको उहाँले बताउनुभयो ।

नेपाल पर्वतारोहण सङ्घअन्तर्गत अन्तर्राष्ट्रिय पर्वतीय सङ्ग्रहालय पोखराद्वारा ४५औँ विश्व पर्यटन दिवसका अवसरमा शनिबार यहाँ आयोजित रुसी नागरिक युरी रोडिचेभद्वारा खिचिएका हिमालहरुको फोटो प्रदर्शनी एवं पुस्तक सार्वजनिक कार्यक्रममा मुख्यमन्त्री पाण्डेले हिमाली क्षेत्रको महत्व विश्वभर प्रचारप्रसार गर्न जरुरी भएको उल्लेख गर्नुभयो । जलवायु परिवर्तनकै कारण नेपालका हिम शृङ्खलामा हिउँ पग्लिने क्रम बढिरहेको उल्लेख गर्दै उहाँले जलवायु परिवर्तनको असरलाई कम गरी हिमालहरुको संरक्षण गर्नतर्फ सरकार र पर्यटन सम्बद्ध संस्थाहरुले ध्यान दिन जरुरी भएको बताउनुभयो ।

पर्यटकीय राजधानी पोखराको पर्यटन विकासमा प्रदेश सरकारले विशेष ध्यान दिएको भन्दै मुख्यमन्त्री पाण्डेले पर्यटनबाट नै गण्डकी प्रदेशको समृद्धि सम्भव हुने बताउनुभयो । अन्तर्राष्ट्रिय पर्वतीय सङ्ग्रहालयको विकास र प्रवद्र्धनमा आफूले सक्दो सहयोग गर्ने उहाँले प्रतिबद्धता व्यक्त गर्नुभयो । “अधिकाशं विदेशी पर्यटक हिमाली क्षेत्रको पदयात्राकै लागि नेपाल आउने गरेकाले यहाँको पदमार्गको प्रचारप्रसार विदेशमा गर्न जरुरी छ,” मुख्यमन्त्री पाण्डेले भन्नुभयो ।

रुसी नागरिक रोडिचेभले २१ वर्षको समय खर्चिएर नेपालका हिमाली क्षेत्रको तस्बिर खिचेर रुसका विभिन्न ठाउँमा प्रदर्शन गरी त्यहाँका आठ करोड जनतालाई नेपालका हिमालहरुका बारेमा जानकारी दिएकामा मुख्यमन्त्री पाण्डेले उहाँको प्रशंसा गर्नुभयो । नेपालका हिमालहरुको महत्व नेपालीले भन्दा पनि विदेशीहरुले बुझेको उल्लेख गर्दै उहाँले हिमालहरुको विदेशमा प्रचार गरी बढीभन्दा बढी पर्यटक नेपाल ल्याउन जरुरी भएको बताउनुभयो ।

गण्डकी प्रदेशका उद्योग तथा पर्यटनमन्त्री मित्रलाल बस्यालले गण्डकी प्रदेश संस्कृति र प्रकृतिले धनी भएकाले यहाँ पर्यटनका सम्भावनाहरु प्रशस्त रहेको बताउनुभयो । गण्डकी प्रदेश नेपालकै उत्कृष्ट पर्यटकीयस्थल भएकाले प्रदेश सरकारले पर्यटनलाई नै पहिलो प्राथमिकतामा राखेर काम गरिरहेको उहाँले जानकारी दिनुभयो ।

सो अवसरमा गण्डकी प्रदेशसभा सदस्य सरस्वती गुरुङले विविधताको धनी गण्डकी प्रदेशको पर्यटन विकासमा सङ्घ र प्रदेश सरकारले ध्यान दिन जरुरी भएको बताउनुभयो । गण्डकी प्रदेश नीति तथा योजना आयोगका उपाध्यक्ष डा कृष्णचन्द्र देवकोटाले जलवायु परिवर्तनको असरकै कारण हिमालहरुमा हिउँ पग्लन थालेको र त्यसलाई कसरी कम गराउन सकिन्छ भन्ने बारेमा सोच्ने बेला आएको बताउनुभयो । कार्यक्रममा नेपाल पर्वतारोहण सङ्घका संस्थापक हरिध्वज तुलाचनले पनि आफ्नो धारणा राख्नुभएको थियो ।

रुसी नागरिक रोडिचेभले आफूले हिमालका चित्र खिच्दा निकै दुःख पाएको र अहिले ती तस्बिर हेर्दा खुसी लागेको बताउनुभयो । चौरासी वर्षीय रोडिचेभले २१ वर्षको समयावधिमा ३२ पटक नेपाल आएर नेपालका हिमालहरुको तस्बिर खिच्नुभएको थियो । उहाँका १४० हिमालका चित्र पुस्तक र फोटो यहाँ सङ्ग्रहालयमा प्रदर्शनीमा राखिएका छन् ।

काठमाडौँ: पूर्वप्रधानमन्त्री एवं नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले सर्वदलीय बैठक आह्वान गर्नुभएको छ ।

अविरल वर्षा, बाढी पहिरो र त्यसबाट उत्पन्न परिस्थितिबारे छलफल गर्न अध्यक्ष दाहालले सर्वदलीय बैठक आह्वान गर्नुभएको उहाँको सचिवालयले जनाएको छ । सिंहदरबारस्थित पार्टीको संसदीय दलको कार्यालयमा बिहान १० बजे बैठक हुनेछ ।

काठमाडौँ: हनुमन्ते खोलाले बगाएर ल्याएको ललितपुरस्थित च्यासलको पुलमा अड्किएको ग्यास बुलेट निकाल्न समस्या देखिएको छ । ललितपुरका एसएसपी शेखर खनालका अनुसार तत्कालका लागि घटनास्थलमा प्रहरी परिचालन गरिएको छ।
बुलेटमा भएको ग्यास लिक भइरहेको छ । घटनास्थलमा प्रहरी प्रभाग कोटेश्वरबाट पनि प्रहरी परिचालन गरिएको
छ । एसएसपी खनालले भने, ‘बुलेटबाट ग्यास चुहिएको हुनाले जोखिम बढेको छ ।’