काठमाडौँ: राष्ट्रपति रामचन्द्र पौडेल प्रोस्टेटसम्बन्धी उपचारका लागि त्रिभुवन विश्वविद्यालय, शिक्षण अस्पताल भर्ना हुनुभएको छ ।

उक्त अस्पतालका निमित्त कार्यकारी निर्देशक प्राध्यापक डाक्टर घनश्याम गुरुङका अनुसार राष्ट्रपतिलाई आज बिहान उपचारार्थ भर्ना गरिएको हो ।

झापा: संसदीय समितिले सुपारीको डिअक्सिराइबोन्यूक्लिक एसिड (डिएनए) परीक्षण गरेरमात्र निर्यातको व्यवस्था गर्न सरकारलाई निर्देशन दिएका कारण यहाँको प्रमुख नगदेबाली सुपारी व्यापार अन्योलमा परेको छ ।

झापालगायत विभिन्न जिल्लामा वर्षौदेखि सुपारी उत्पादन हुँदै आएको छ । नेपालमा उत्पादित सुपारी भारत निर्यात हुने गरेको छ । सुपारी उत्पादक किसान सङ्घका अनुसार बर्सेनि पूर्वी भेगमा १५ हजार मेट्रिक टन सुपारी उत्पादन हुन्छ । प्रचलित बजार मूल्यअनुसार उक्त परिमाणको सुपारीलाई रु आठ देखि १२ अर्बसम्म पर्छ ।

नीतिगत अन्योलका कारण निर्यात रोकिँदा झापादेखि उदयपुरसम्म सुपारीखेतीमा आबद्ध एक लाख किसानको भविष्य अन्धकार उन्मुख भएको सङ्घका केन्द्रीय अध्यक्ष नीलकण्ठ तिवारीले बताउनुभयो । “संसदीय समितिले डिएनए जाँच गरेरमात्र निर्यात गर्ने व्यवस्था मिलाउनू भनेर अर्थ र वाणिज्य मन्त्रालयलाई निर्देशन दिएको छ”, उहाँ भन्नुहुन्छ, “दुई वर्ष भइसक्यो कहाँ हुने हो सुपारीको डिएनएन, केही अत्तोपत्तो छैन ।”

विसं २०७९ साउन १३ गते राष्ट्रियसभाको दिगो विकास तथा सुशासन विकास समितिले डिएनए परीक्षणपछि मात्र सुपारी निर्यात गर्न वाणिज्य मन्त्रालय र अर्थ मन्त्रालयमा पत्राचार गरेको उहाँले बताउनुभयो । डिएनए परीक्षण गर्ने भनिए पनि हालसम्म प्रयोगशाला स्थापना भएको छैन ।

देशमा उत्पादित सुपारी निर्यातका लागि भारतले निश्चित कोटा तोक्ने गरेको छ । इण्डोनेसियाबाट आयातित सुपारीलाई यही कोटामा भारत निर्यात हुनबाट रोक्न डिएनए गरेर देशभित्रै उत्पादन भएको प्रमाणित गर्न संसदीय समितिले सरकारलाई निर्देशन दिएको हो । डिएनए परीक्षणको उल्झन सुपारी निर्यातको प्रमुख बाधक बनेको किसान बताउँछन् । गत वर्षदेखि सुपारी निर्यात भएको छैन ।

मेचीनगर नगरपालिका–का जीवन पाण्डे यो वर्ष पनि सुपारी नबिक्ने चिन्ताले पिरोलिनु भएको छ । धान खेत मासेर उहाँले डेढ बिघामा सुपारीखेती गर्नुभएको छ । “बोटमा लटरम्म दाना छन्, किन्ने व्यापारी आउँदैनन्”, किसान पाण्डेले समस्या सुनाउँदै भन्नुभयो, “दुई वर्षअघि व्यापारी सुपारीका चिचिला लाग्दादेखि आउँथे ।”

मेचीनगर–४ बाहुनडाँगीका वडासदस्य पवन बराइलीले सुपारी किसानलाई सहुलियत र सुविधा दिन चुक्दै आएको सरकारले बजारीकरणमा पनि सहजीकरण नगरेको गुनासो गर्नुभयो । बाहुनडाँगीमा ज¬ङ्गली हात्तीले धान, मकैलगायत बाली नोक्सान गर्न थालेपछि किसान जीविकाका लागि सुपारी, चियालगायत नगदेबालीतर्फ आकर्षित भएका तर सुपारी नबिक्दा किसानको बिचल्ली भएकामा उहाँले दुःख व्यक्त गर्नुभयोे ।

झापाका बाहुनडाँगी, शनिश्चरे र बुधबारे सुपारी उत्पादनमा अग्रणी मानिन्छन् । यहाँका किसान सुपारी किन्न हालसम्म व्यापारी नआउँदा चिन्तित छन् । सङ्घका अध्यक्ष तिवारी सुपारीको डिएनए परीक्षणमा अल्झिन नहुने बताउनुहुन्छ । सरकारले दानाको डिएनए परीक्षण हुनुपर्ने बताए पनि फरक समय र मात्रामा निर्यात हुने सुपारीको डिएनए सम्भव नहुने उहाँले बताउनुभयो ।

काठमाडौं: चीनका राष्ट्रपति सि चिनपिङले नेपाललाई ५०० मिलियन आरएमबी अर्थात करिब ९ अर्ब रूपैयाँ अनुदान सहयोग गर्ने घोषणा गरेका छन्।

प्रधानमन्त्री केपी शर्मा ओली र चिनियाँ राष्ट्रपति सि चिनपिङबीचको भेटवार्तामा उक्त अनुदानको घोषणा भएको प्रधानमन्त्रीको सचिवालयले जनाएको छ।

चार दिने चीनको औपचारिक भ्रमणमा रहेका प्रधानमन्त्री ओलीले चिनियाँ राष्ट्रपति सिसँग आज भेटघाट तथा छलफल गरेका थिए, सोही क्रममा उक्त घोषणा भएको हो। चीनका प्रधानमन्त्री ली छ्याङको मैत्रीपूर्ण निमन्त्रणामा प्रधानमन्त्री ओली चार दिने भ्रमणका लागि सोमबार चीन प्रस्थान गरेका थिए।

बेइजिङ पुगेको भोलिपल्ट अर्थात मंगलबार, चिनियाँ समकक्षी ली छ्याङसँग भेटवार्ता गरी द्विपक्षीय आपसी हितका विविध विषयमा विचार आदानप्रदान गर्नुका साथै ९ बुँदे सहमतिमा हस्ताक्षर गरेपछि प्रधानमन्त्री ओलीले चिनियाँ राष्ट्रपति सि चिनपिङसँग भेट गरेका हुन्।

प्रधानमन्त्री ओली यही मंसिर २० गते स्वदेश फर्कने कार्यक्रम छ।

सोल, दक्षिण कोरिया:  चर्चित अभिनेता पार्क मीन जेको निधन भएको छ। ३२ वर्षीय पार्कको मृत्यु कार्डियक अरेस्टका कारण भएको जानकारी प्राप्त भएको छ।

कोरियाली सञ्चार माध्यमका अनुसार, पार्क मीन जे चीनमा बिदा मनाउन गएका थिए र त्यहीँ उनको निधन भएको बताइएको छ।

उनको परिवार र एजेन्सीले सामाजिक सञ्जालमार्फत दुखद समाचार सार्वजनिक गरेका छन्। उनका अंतिम संस्कारको प्रक्रिया इवाह सोल अस्पतालमा नोभेम्बर ४ मा गरिनेछ।

पार्क मीन जेले कोरियाली ड्रामा फिल्म र सिरिजमा उल्लेखनीय काम गरेका थिए। उनी विशेष गरी कोरियाली ड्रामा सिरिज ‘आइडल: द कूप’का लागि चर्चित थिए। यसका अतिरिक्त उनले ‘लिटल वुमन’, ‘नम्बर्स’, ‘कोरियन–खितन वार’, र ‘कल इट लभ’ जस्ता चर्चित ड्रामा श्रृंखलामा पनि भूमिका निर्वाह गरेका छन्।

उनले हालै ‘स्न्याप एन्ड स्पार्क’ नामक ड्रामामा पनि अभिनय गरेका थिए।

पार्क मीन जेको असामयिक निधनले कोरियाली मनोरञ्जन उद्योगलाई ठूलो धक्का पुर्‍याएको छ, र उनका प्रशंसक र साथी कलाकारहरूले उनको सम्झनामा श्रद्धाञ्जलि अर्पण गर्दैछन्।