काठमाडौं । राष्ट्रिय स्वतन्त्र पार्टी (रास्वपा)का सांसद गणेश पराजुलीले सुशासन, प्रणाली सुधार र भ्रष्टाचार नियन्त्रणमार्फत मात्रै समृद्ध नेपालको सपना साकार पार्न सकिने बताएका छन्।
नेपाल रत्न तथा आभूषण संघको २०औँ वार्षिक साधारण सभा तथा आठौँ महाधिवेशनको उद्घाटन सत्रलाई सम्बोधन गर्दै उनले संसद्का विभिन्न समितिमार्फत नीतिगत सुधारका प्रयासहरू भइरहेको जानकारी दिए। नयाँ पुस्ताले राजनीतिमार्फत देशलाई सही दिशामा अघि बढाउने जिम्मेवारी लिएको उल्लेख गर्दै उनले जनताको विश्वासलाई परिवर्तनको आधार बनाउनुपर्ने बताए।
सांसद पराजुलीले संसद्को प्रभावकारी अभ्यासमार्फत नीति निर्माण र सुधारका केही सकारात्मक उदाहरण स्थापित भएको उल्लेख गर्दै राजनीतिले दिएको अवसरलाई परिणाममुखी बनाउनुपर्ने धारणा राखे। उनका अनुसार समृद्ध नेपालको आधार सुशासनयुक्त समाज निर्माण हो।
“हामीले बलियो धरातल निर्माण गर्नुपर्छ, र त्यो धरातल सुशासनयुक्त समाज हो,” उनले भने, “सुशासनको सबैभन्दा ठूलो बाधक भ्रष्टाचार हो। त्यसको अन्त्यका लागि प्रणाली सुधारमा केन्द्रित भएर काम गर्न आवश्यक छ।”
उनले नेपालको प्रशासनिक तथा शासकीय प्रणाली लामो समयदेखि विभिन्न विकृति र विसंगतिबाट प्रभावित हुँदै आएको बताए। यसको असर निजी क्षेत्रसम्म पुगेको उल्लेख गर्दै व्यवसायीहरूले पनि राज्य संयन्त्रसँग सम्बन्धित विभिन्न चुनौती भोग्नुपरेको बताए।
“व्यवसाय सञ्चालनका क्रममा बाध्यता वा व्यक्तिगत स्वार्थका कारण विकसित भएका विकृतिहरू समयसँगै संस्थागत समस्याका रूपमा रूपान्तरित भए,” उनले भने। “ती समस्याको समाधानका लागि विभिन्न समयमा प्रतिबद्धता र प्रयास भए पनि समस्या गहिरिँदै गएकाले अपेक्षित परिणाम हासिल हुन सकेन।”
पराजुलीले विगतका नेतृत्वहरूले आफ्ना निकटवर्ती र प्रभावशाली व्यक्तिमाथि कारबाही गर्न नसक्दा भ्रष्टाचार नियन्त्रण प्रभावकारी हुन नसकेको टिप्पणी गरे। त्यसकै परिणामस्वरूप राज्य प्रणालीमा सुधार अपेक्षाअनुसार हुन नसकेको उनको भनाइ थियो।
हाल भने देश सुशासनतर्फ अघि बढ्ने नयाँ चरणमा प्रवेश गरेको दाबी गर्दै उनले कानुनी शासनलाई बलियो बनाउनु आवश्यक रहेको बताए। कानुन सबै नागरिकका लागि समान रूपमा लागू हुनुपर्नेमा उनले जोड दिए।
“कानुन साना व्यक्तिलाई मात्र होइन, शक्तिशाली र प्रभावशाली व्यक्तिलाई पनि समान रूपमा लागू हुन्छ भन्ने विश्वास स्थापित गर्न सके मात्रै भ्रष्टाचारको जरा हल्लाउन सकिन्छ,” उनले भने। “शक्तिशाली व्यक्तिलाई कानुनी दायराभन्दा बाहिर राखेर सुशासनको लक्ष्य हासिल गर्न सकिँदैन।”
उनले जनताले देखेको समृद्ध, व्यवस्थित र न्यायपूर्ण नेपालको सपना पूरा गर्न कानुनको निष्पक्ष कार्यान्वयन अपरिहार्य रहेको बताए।
सांसद पराजुलीले निजी क्षेत्रलाई अर्थतन्त्रको मेरुदण्डको संज्ञा दिँदै सुशासनको अभियानमा सक्रिय सहभागिता जनाउन आग्रह गरे।
“यो अभियान डरको होइन, विश्वासको अभियान हो,” उनले भने, “राष्ट्र निर्माणको महाअभियानमा निजी क्षेत्रले अग्रसर भूमिका खेल्नुपर्छ। सरकारले प्रणालीभित्र रहेका विकृति र बेथितिहरू नियन्त्रण गर्ने काम गरिरहेको छ।”
उनले सरकार, निजी क्षेत्र र नागरिक समाजबीच विश्वास, सहकार्य र साझेदारीको वातावरण निर्माण गर्न सके मुलुकलाई आर्थिक समृद्धि, सुशासन र दिगो विकासतर्फ अघि बढाउन सहज हुने विश्वास व्यक्त गरे।
