काठमाडौं । सामुदायिक विद्यालयको शैक्षिक गुणस्तर र भौतिक अवस्थाबारे स्थलगत जानकारी लिन शिक्षा तथा खेलकुदमन्त्री सस्मित पोखरेलले काठमाडौंका विभिन्न सामुदायिक विद्यालयमा आकस्मिक छड्के अनुगमन थालेका छन् ।
वर्षौंदेखि सामुदायिक विद्यालयको गुणस्तर सुधारका लागि विभिन्न योजना तथा कार्यक्रम सञ्चालन हुँदै आए पनि त्यसको प्रभावकारितामाथि प्रश्न उठिरहेका बेला मन्त्री पोखरेल आफैं विद्यालयमा पुगेर अवस्थाको निरीक्षण गर्न थालेका हुन् ।
अनुगमनका क्रममा केही विद्यालयमा भौतिक संरचनाको अवस्था कमजोर, विद्यालय व्यवस्थापनमा लापरबाही तथा शिक्षकको जिम्मेवारीप्रति गम्भीर प्रश्न उठ्ने अवस्था देखिएको बताइएको छ । विद्यार्थीले गुणस्तरीय शिक्षा प्राप्त गर्न कठिनाइ भोगिरहेका अवस्थामा विद्यालय प्रशासन भने कागजी प्रगति प्रतिवेदनमै सीमित हुने गरेको अवस्थासमेत अनुगमनका क्रममा देखिएको जनाइएको छ ।
मन्त्री पोखरेलले विद्यार्थी तथा शिक्षकसँग प्रत्यक्ष संवाद गर्दै विद्यालयका समस्या र गुनासा सुनेका छन् । कतिपय विद्यालयमा पाठ्यपुस्तकको अभाव, जीर्ण छाना तथा शौचालयको दयनीय अवस्थालगायत समस्या देखिएपछि उनले सुधारका लागि आवश्यक कदम चालिने बताएका छन् ।
विद्यालयको वास्तविक अवस्था स्थलगत रूपमा बुझेर समस्या पहिचान गर्ने र त्यसका आधारमा सुधारका योजना अघि बढाउने उद्देश्यले अनुगमन गरिएको मन्त्रालयले जनाएको छ ।
मन्त्रीको आकस्मिक अनुगमनले विद्यालय व्यवस्थापन तथा प्रशासनलाई आफ्नो जिम्मेवारीप्रति थप जवाफदेही बनाउन सहयोग पुग्ने अपेक्षा गरिएको छ । काठमाडौंमा सुरु भएको अनुगमनलाई आगामी दिनमा अन्य जिल्लाका सामुदायिक विद्यालयसम्म विस्तार गरिने वा नगर्ने विषयमा भने मन्त्रालयको आगामी कार्ययोजनाले स्पष्ट पार्नेछ ।
