काठमाडौं: ट्रम्प प्रशासनले हार्वर्ड विश्वविद्यालयलाई फेरि एकपटक कडा चेतावनी दिएको छ।
अमेरिकी गृह सुरक्षा सचिव क्रिस्टी नोएमले हार्वर्डमाथि “राष्ट्रिय सुरक्षामा खतरा पुर्याउने” र “यहूदी विरोधी भावनाको अखडा बन्ने” आरोप लगाउँदै विश्वविद्यालयमा विदेशी विद्यार्थीहरूको प्रवेशमा प्रतिबन्ध लगाउन सकिने संकेत दिएकी छन्।
नोएमले विश्वविद्यालय प्रशासनलाई पत्र लेख्दै विदेशी विद्यार्थीहरूका “अवैध र हिंसात्मक गतिविधिहरू” को विस्तृत विवरण माग गरेकी छन्। हाल हार्वर्ड विश्वविद्यालयमा भर्ना भएका अन्तर्राष्ट्रिय विद्यार्थीहरूको संख्या २७ प्रतिशतभन्दा बढी रहेको छ।
यसअघि ह्वाइट हाउसले हार्वर्ड विश्वविद्यालयको प्रशासन, भर्ती र भर्ना प्रक्रियामा सुधारको माग गर्दै एक सूची पठाएको थियो। तर हार्वर्डले ती मागहरू अस्वीकार गर्दै ह्वाइट हाउसले विश्वविद्यालयमाथि अनुचित नियन्त्रण जमाउने प्रयास गरिरहेको आरोप लगाएको थियो।
जवाफस्वरूप ट्रम्प प्रशासनले विश्वविद्यालयलाई दिँदै आएको दुई अर्ब अमेरिकी डलर बराबरको सरकारी कोष रोक्ने घोषणा गरेको छ।
