पेरिस। फ्रान्सका प्रधानमन्त्री सेबेस्टियन लेकोर्नुले पद सम्हालेको एक महिनाभन्दा कम समयमै राजीनामा दिएपछि राष्ट्रपति इमानुएल म्याक्रोन गम्भीर राजनीतिक संकटमा छन्।
राजीनामापछि पेरिसको सेन नदी किनारमा म्याक्रोनलाई सुरक्षाकर्मीबाट केही टाढा फोनमा व्यस्त देखाइएको थियो। उनले कोसँग र के विषयमा कुरा गर्दैछन् भन्ने स्पष्ट छैन, तर दृश्यले उनको राजनीतिक एकान्तताको संकेत दिएको छ। म्याक्रोन अहिले सीमित र जोखिमपूर्ण विकल्पहरूमध्ये कुन बाटो रोज्ने भन्नेमा गहिरो सोचमा छन्।
सन् २०२७ मा आफ्नो दोस्रो कार्यकाल पूरा गरेपछि पद छोड्नुपर्ने म्याक्रोनका लागि चार सम्भावित विकल्प प्रस्तुत छन्, तर यीमध्ये कुनै पनि सजिलो वा तत्काल समाधान होइन।
१. लेकोर्नुलाई पुनः नियुक्त गर्ने विकल्प
पूर्व रक्षामन्त्री र म्याक्रोनका नजिकका व्यक्ति ब्रुनो ले मायरको सुझाव अनुसार लेकोर्नुलाई फेरि अवसर दिन सकिन्छ। एलिसीले उनलाई नयाँ कार्ययोजना बनाउन दुई दिनको समय दिएको छ। तर संसद्मा बहुमतको अभावका कारण विश्वासको मत जित्ने सुनिश्चितता छैन। विश्लेषक पल टेलरका अनुसार मूल समस्या अझै बजेट, पेन्सन सुधार र आप्रवासनजस्ता विषयमा सहमति नहुनु हो।
२. नयाँ प्रधानमन्त्रीको खोजी
नयाँ प्रधानमन्त्री नियुक्त भएमा यो आठौँ र यसै वर्षको तेस्रो प्रधानमन्त्री हुनेछन्। वामपन्थी दलहरूले जनमुखी नीति लागू गर्न सक्ने व्यक्तिलाई सुझाव दिएका छन्। तर स्थायित्वको ग्यारेन्टी छैन, र केही हप्तामै नयाँ प्रधानमन्त्री अपदस्थ हुन सक्छ, जसले नयाँ निर्वाचन अपरिहार्य बनाउनेछ।
३. प्रारम्भिक निर्वाचनको सम्भावना
सन् २०२४ को मध्यावधि चुनावको अनुभवपछि म्याक्रोनले समयपूर्व चुनाव बोलाउन अहिलेसम्म प्रतिरोध गरेका छन्। तर लेकोर्नुको प्रयास असफल भए, उनले प्रारम्भिक निर्वाचन गर्ने बाटो रोज्न सक्ने सङ्केत छ। यसले नेसलन र्याली (आरएन) लाई संसद्मा अझ बलियो बनाउन सक्छ र जोर्डन बार्डेलालाई प्रधानमन्त्री बन्ने मौका दिन सक्छ। तथापि नयाँ चुनावले परिणाम फरक ल्याउने सुनिश्चितता छैन।
४. राष्ट्रपतिको राजीनामाको सम्भावना
म्याक्रोनले अहिलेसम्म कार्यकाल पूरा नहुँदै पदत्याग गर्ने विचार अस्वीकार गर्दै आएका छन्। तर बढ्दो दबाबका कारण यस्तो सम्भावना पूर्ण रूपमा असम्भव छैन। विश्लेषक सेलिया बेलिनका अनुसार नयाँ चुनावले स्थायी बहुमत नल्याएमा राजनीतिक संकट गम्भीर बन्न सक्छ र म्याक्रोनको सत्तामा टिकिरहने क्षमता प्रश्नमा पर्न सक्छ।
