काठमाडौं: “बल अहिले चीनको कोर्टमा छ। चीनले हामीसँग सम्झौता गर्नुपर्छ, हामीले उनीहरूसँग गर्नुपर्ने बाध्यता छैन।”
यो भनाइ अमेरिकी राष्ट्रपति डोनाल्ड ट्रम्पको हो, जुन मंगलबार ह्वाइट हाउसकी प्रेस सचिव क्यारोलिन लेभिटले पत्रकार सम्मेलनमा पत्रकारहरूलाई उद्धृत गर्दै पढेर सुनाइन्।
प्रेस विज्ञप्तिमा उल्लेख गरिएको छ, “चीनले चाहेको कुरा हामीसँग छ — अमेरिकी उपभोक्ताहरू।”
प्रेस सचिव लेभिटले थप भनिन्, “राष्ट्रपतिले फेरि एकपटक स्पष्ट पारेका छन् कि उनी चीनसँग वार्ताको लागि तयार छन्, तर चीनले अमेरिकासँग सम्झौता गर्नुपर्नेछ।”
यसैबीच, चिनियाँ राष्ट्रपति सी जिनपिङ र उनका शीर्ष अधिकारीहरूले आफ्ना व्यापारिक साझेदारहरूलाई अमेरिकी भन्सार शुल्कको विरुद्धमा एकजुट हुन र “अन्तसम्म लड्ने” संकल्प गर्न आग्रह गरेका छन्।
तर चीनले वार्ताका लागि ढोका खुला रहेको बताउँदै संवादको सम्भावना अझै कायम रहेको संकेत दिएको छ।
