हेटौँडा: नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले प्रत्यक्ष निर्वाचित राष्ट्रपतिय प्रणालीका लागि देशव्यापी मेची-महाकाली अभियान चलाउने घोषणा गरेका छन्।
मकवानपुरको थाहा नगरपालिकामा आयोजित योङ्ग कम्युनिष्ट लिग (वाइसिएल) को दोस्रो नगर सम्मेलनलाई सम्बोधन गर्दै अध्यक्ष प्रचण्डले प्रत्यक्ष निर्वाचित राष्ट्रपतिबाट पाँच वर्षका लागि स्थिर सरकार सञ्चालन हुने भएकाले अस्थिरताको समस्या समाधान हुने दाबी गरे। उनले व्यवस्था परिवर्तनको सुरुआती दिनदेखि नै यो मुद्दा उठाउँदै आएको पनि स्मरण गराए।
उनले आफ्नो पहिलो कार्यकालमा ३० हजारसम्मको कर्जा मिनाहा गरी जनतालाई राहत दिएको र दोस्रो कार्यकालमा उज्यालो नेपाल अवधारणा अनुसार विद्युत्भार कटौती हटाएको जानकारी गराए। उनले भने, “मैले पहिलोपटक प्रधानमन्त्री हुँदा ऋण मिनाह गरें, पूर्व–पश्चिम जोड्ने मध्यपहाडी लोकमार्गको काम अघि बढाएँ। म अझै थाकेको छैन र थप परिवर्तन ल्याउने प्रयास जारी राख्नेछु।”
अध्यक्ष दाहालले मकवानपुर र थाहा नगरका विकास योजनाहरूलाई माओवादीकै पहलमा प्रभावकारी रूपमा अघि बढाइने आश्वासन दिए। उनले थानकोन-चित्लाङ-चन्द्रागिरी सडकलाई गणेशमान राजमार्गमा स्तरोन्नति गरेर कालोपत्रे गर्ने र फोदगाउँ वस्ती बचाउ कार्यक्रमलाई सहयोग गर्ने प्रतिबद्धता व्यक्त गरे।
माओवादी केन्द्रको पहल र बागमती सरकारको लगानीमा कबर्ड हल निर्माणको अन्तिम चरणमा रहेको र शीतभण्डार स्थानीय सरकारको विशेष पहलमा निर्माण गरिएको जानकारी उनले दिए। दामगाडे-महादेववेशी सडक ९८ करोडको लगानीमा निर्माण भइरहेको, एकीकृत सहरी पूर्वाधार कार्यक्रमअन्तर्गत कञ्छाल-कलेचानी सडकमा १० करोडको प्याकेजमा काम भइरहेको तथा मदन भण्डारी विज्ञापन तथा प्रविधि विश्वविद्यालय थाहाको चित्लाङमा स्थापना गरिएको अध्यक्ष प्रचण्डले बताए।
