काठमाडौं: नेपाल टेलिकमको विलिङ प्रणाली अपग्रेड गर्ने प्रक्रियामा मिलेमतोमा अनियमितता गरी भ्रष्टाचार गरेको अभियोगमा अख्तियार दुरुपयोग अनुसन्धान आयोगले टेलिकमका वर्तमान प्रबन्ध निर्देशक संगिता पहाडीसहित १८ जनाविरुद्ध विशेष अदालतमा मुद्दा दायर गरेको छ।
आयोगले आइतबार विशेष अदालतमा दायर गरेको आरोपपत्रअनुसार, तत्कालीन प्रबन्ध निर्देशक सुनिल पौडेल, तत्कालीन प्रमुख व्यावसायिक अधिकृत (हालकी प्रबन्ध निर्देशक) संगिता पहाडी, लगायत अन्य कर्मचारीले नेपाल दूरसञ्चार कम्पनी लिमिटेड (नेपाल टेलिकम) को सम्पत्तिमा हिनामिना गरी संस्था र राज्यलाई आर्थिक हानि पुर्याएको उल्लेख गरिएको छ।
३३ करोड बिगो, ९ करोड बढी असुल माग
अख्तियारका अनुसार, आरोपितहरूविरुद्ध कुल ३३ करोड ४८ लाख १७ हजार ४३० रुपैयाँ बिगो दाबी गरिएको छ।
त्यसमध्ये ९ करोड ८८ लाख ४१ हजार ९५६ रुपैयाँ तत्काल असुलउपर गर्नुपर्ने मागसहित आयोगले मुद्दा दायर गरेको विशेष अदालतका सूचना अधिकारी शाखा अधिकृत यज्ञराज रेग्मीले जानकारी दिनुभयो।
विलिङ प्रणाली खरिदमा देखिएको अनियमितता
रेग्मीका अनुसार, टेलिकमको नयाँ विलिङ प्रणाली (Billing System) खरिद प्रक्रियामा व्यापक अनियमितता भएको प्रारम्भिक छानबिनबाट पुष्टि भएको छ।
यो प्रकरणले सार्वजनिक संस्थामा देखिएको प्रशासनिक लापरवाही र कमजोर अनुगमन संयन्त्रप्रति गम्भीर प्रश्न उठाएको छ।
